Monday, October 8, 2012

လွန်





          ကျွန်တော် လှေဆိပ်ကို ဆင်းလာခဲ့ပြီ။ ဖြတ်သန်းတိုက်ခတ်လာတဲ့ လေနုအေးက ရင်ဝကို တည့်တည့်။ ကျွန်တော် ဘာတွေကို ဆုံးဖြတ်လာခဲ့သလဲ။ ကျွန်တော်ကိုယ်တိုင်လည်း မသိချင်တော့။ နားမလည်တော့။ သေချာတာကတော့ ကျွန်တော် တစ်ယောက်ယောက် (သို့မဟုတ်) တစ်ယောက်သောသူကို ကျောခိုင်းဖို့ ပြင်ဆင်လိုက်ပြီ။ ကျွန်တော့်ကို ဒီလိုလုပ်ရက်သလားလို့ ကျွန်တော့်ကို မေးလိမ့်မယ် ငိုရှိုက်သံသဲ့သဲ့ကိုတောင် မကြားလို။ ကျွန်တော်ဟာ တစ်ကိုယ်ကောင်းနဲ့ အတ္တဆန်ခဲ့သူတစ်ယောက်လား။ အိတ်ထဲမှာ ပိုက်ဆံအနည်းငယ်နဲ့ စားစရာအချို့၊ သံလိုက်အိမ်မြှောင်။ နောက် ဓားတစ်လက်။ သွားမဲ့ခရီးက၊ မြစ်ကြောင်းတစ်လျှောက် စားသောက်စရာ ရေ အတွက်က မပူပင်ပါ။ လိုအပ်တာက ပန်းတိုင်မရောက်ခင် လက်ပန်းကျမသွားဖို့ဘဲ။ ရေစီးသန်တဲ့နေရာတွေကို ဖြတ်ကျော်နိုင်ဖို့ မှန်ကန်တဲ့ ဆုံးဖြတ်ချက်နဲ့ ခွန်အားတစ်လက်ကတော့ ကိုယ်နဲ့မခွဲမခွာ အတူပါဖို့ လိုအပ်ပါလိမ့်မယ်။ သတိနဲ့ ခွန်အားသတ္တိတွေအတွက် ကျွန်တော်ပြင်ဆင်ပြီးခဲ့ပြီ။

          မြစ်ကြောင်းတစ်လျှောက် ခရီးဆုံးပန်းတိုင်မှာ ကျွန်တော့်မျှော်လင့်ချက်တွေ ရှိတယ်။ ဆီးကြိုနေမဲ့ မြို့လေးပေါ်မှာ ကျွန်တော့်ရင်ခုန်သံနဲ့အတူ ကျွန်တော် ရှာဖွေသိမ်းပိုက်လိုတဲ့ အောင်မြင်မှုတွေ ရှိမယ်။ နောက်ပြီး အမှန်တကယ် ငြိမ်းအေးတဲ့ဘဝ။ ကျွန်တော် အမှန်တကယ် မြတ်နိုးတန်ဖိုးထားတဲ့ဘဝ။

          လယ်ကွင်းပြင်တစ်ခုလုံးမှာ ကျွန်တော့်ရဲ့ ခြေတစ်စုံကို ရပ်တန့်လိုက်မိတယ်။ နောက်ကို ပြန်လှည့်ကြည့်မိတော့ ငှက်ပျောတော စိမ်းစိမ်းစိုစိုဘေးမှာ ကျွန်တော်နေထိုင်ခဲ့တဲ့ အိမ်ကလေး၊ အိမ်ကလေးက နေရောင်အောက်မှာ အဝါရောင်သန်းနေသယောင်။

          ကျွန်တော် ကျေနပ်စွာ တစ်ချက်ပြုံးလိုက်မိတယ်။ ကျွန်တော့် ပခုံးပေါ်အဝေးက ပျံသန်းလာတဲ့ ရွှေဂဲ။ ကြက်တူရွေးလေးက "ဘယ်သွားမလို့လဲ ဘယ်သွားမလို့လဲ" လို့ မေးလာတယ်။ ကျွန်တော် ဘယ်လို ပြန်ဖြေရမှန်းမသိ။ အဲဒီအချိန်မှာပဲ နက်တိုးက နောက်က တစ်ဟုန်ထိုးပြေးလိုက်လာပြီ။ ကျွန်တော့် ခြေထောက်တွေ ရှေ့ရောက်လာပြီး သူ့ဦးခေါင်းနဲ့ အတင်းဝှေ့တယ်။ ကျွန်တော့်မျက်နှာကို မော့ကြည့်တယ်၊ သူ့မျက်လုံးတွေကလည်း ကျွန်တော့်ကို မေးနေသယောင်။

          ဘာပဲဖြစ်ဖြစ် မင်းတို့အဝါရောင်သန်းနေတဲ့ အိမ်ကလေးဆီ ပြန်ကြပါကွာ။ အသစ်ပြင်ဆောက်ထားတဲ့ ငါ့အိမ်လေးက နောက်ထပ် ဆယ်မိုးလောက် ခိုင်ခံစွာ တည်ရှိနေမှာပါ။ မလိုက်ခဲ့ကြပါနဲ့။ ဟိုးရှေ့မှာ မြစ်ဆိပ်ကို ငါမြင်နေရပြီ။ ငါတားလည်း မင်းတို့က ရမှာမဟုတ်ဘူး။ ဆင်ခြေလျှောအဆုံးထိပဲ လိုက်ခဲ့ကြပါ။

          နက်တိုးက ကျွန်တော့် ခြေထောက်တွေကို ကုတ်ခြစ်နေပြီ။ သူ မသွားစေချင်ကြောင်း ဆန္ဒပြနေပြီ။ ရွှေဂဲက ကျွန်တော့်ပခုံးပေါ် မကြည်မလင် လိုက်ပါလာရင်း အတောင်တဖျတ်ဖျတ်ခတ်လို့။

          ဆင်ခြေလျှောအဆုံးမြစ်ဆိပ်ရောက်တော့ မြစ်ကြောင်းတစ်လျှောက် သယ်ဆောင်လာတဲ့ လေအေးအေးက လတ်ဆတ်လို့။ နက်တိုးနဲ့ ရွှေဂဲကို ဘယ်လိုလုပ်ရမလဲ။ ကျွန်တော်ထွက်သွားတာကို သူတို့ကြည့်ရက်နိုင်မှာ မဟုတ်သလို သူတို့မြစ်ဆိပ်က ကုန်းပေါ်မှာ ကျန်ရစ်ခဲ့မှာကိုလည်း ကျွန်တော် မကြည့်နိုင်။ လက်ထဲက ကျောပိုးအိတ်ကို တင်းကျပ်စွာဆုပ်ကိုင်ရင်း လှေကလေးဆီ ဦးတည်လိုက်တယ်။ နက်တိုးရော ရွှေဂဲရော လိုက်လာသေးတယ်။ အိတ်ထဲပါလဲာ့ မုန့်တချို့ကိုနှိုက်ပြီး ကျွေးတော့ သူတို့နှစ်ယောက်လုံး မစားကြ၊ အနံ့တောင်မခံ။ ဘယ်လိုလုပ်ရမလဲ။ ကျောပိုးအိတ်ကို လှေပေါ်ပစ်တင်လိုက်တယ်။ လှေက အနည်းငယ် လူးလွန့်သွားတယ်။

          ခြေဟန်လက်ဟန်ပြရင်း မောင်းထုတ်လိုက်တော့ နက်တိုးရော၊ ရွှေဂဲရော မျက်နှာပျက်သွားသလို ဘယ်လိုမှ တားမရတဲ့အဆုံး ကျွန်တော့်ကို စိတ်ပျက်၊ စိတ်မကောင်းဟန်နဲ့ ရပ်ကြည့်လို့။ နက်တိုးကျောပေါ်မှာ ရွှေဂဲကရပ်လို့။ ငါ မင်းတို့ကို ချစ်ပါတယ်။

          လှော်တက်ကို အသာတင်ရင်း ငုတ်မှာချည်ထားတဲ့ ကြိုးကို ဖြေပြီး မြစ်ဆိပ်မှာ ရပ်နေမိတယ်။ နောက်ကျောဆီမှာ နက်တိုးနဲ့ ရွှေဂဲက မပြန်နိုင်၊ ကျွန်တော် သူတို့ကို လှည့်မကြည့်ရက်နိုင်တော့။ ကျွန်တော် အားခဲစွာ ပြင်ဆင်ရပြီ။ ပြင်ဆင်တုန်း ကျွန်တော့်နားထဲ အသံသဲ့သဲ့လေးတစ်ခု နောက်ကျောဆီမှာ ကြားလိုက်ရတယ်။ အသာနားစွင့်မိတော့ စူးစူးရှရှနဲ့ ထွက်ပေါ်လာတယ်။

          လယ်ကွင်းပြင်ဆီက အသံ။

          နောက်ထပ် အသံသဲ့သဲ့လေး ထွက်ပေါ်လာပြန်တယ်။

          အံတစ်ချက်ကြိတ်ပြီးလေကို ခပ်ပြင်းပြင်းရှူလိုက်မိတယ်။

          အဲဒီအသံလေး။ အသံလေးအိပ်စက်နေပြီ။ အိပ်မောကျနေပြီလို့ ထင်ထားခဲ့တာ။

          ကာလကြာရှည်နီးစပ်နေခဲ့တဲ့ အသံလေး။ နှလုံးသားတွေ လှုပ်ခတ်လာတယ်။

          နောက်အသံလေးက ကြည်လင်လာတယ်။ ပိုနီးကပ်လာတယ်။

          ကျွန်တော့်နှလုံးသားတွေကို ဆွဲညှစ်သိမ်းပိုက်စေခဲ့တဲ့ အသံလေး။

          လေတစ်ချက်ဝှေ့တာနဲ့အခိုက် ကျွန်တော့်လှေရော လူပါ လူးလွန့်သွားတယ်။ ကျွန်တော့်ရင်တွေတုန်နေပြီ။ ဖြည်းဖြည်းမှန်မှန် လေကို မှုတ်ထုတ်ရင်း လှေဦးထိပ်ကို မြစ်ပြင်အတွင်း တွန်းထုတ်ပစ်လိုက်တယ်။ ဘဝအမောတွေဟာ လေတွေနဲ့အတူ ပါသွားရင် သိပ်ကောင်းမှာပဲ။

          နောက်ထပ် ကျွန်တော် ထပ်ကြားခဲ့ရတဲ့ အသံသဲ့သဲ့လေးနဲ့အတူ လေပြင်းပြင်းတစ်ချက် တိုက်ခတ်သွားတယ်။ ကျွန်တော့်လက်ထဲက လှေဦးမှာ ချည်ထားတဲ့ကြိုးလေး လွတ်ထွက်သွားတယ်။

          တမင်လွှတ်လိုက်မိတာလား။ ဒါမှမဟုတ် လေရဲ့အရှိန်ကြောင့် လွတ်ထွက်သွားခဲ့တာလား။ ပဲ့ကိုင်သူမရှိတဲ့ လှေငယ်လေး ရေလှိုင်းထက်မှာ တရွေ့ရွေ့နဲ့ မြစ်ဆိပ်မှ ဝေးရာဆီ၊ မြစ်ကြောင်းအဆုံးမှာ မြို့လေးရှိသလို အဲဒီမြို့လေးထဲမျာ ကျွန်တော် ရှာဖွေသိမ်းပိုက်လိုတဲ့ ရင်ခုန်သံနဲ့အတူ အောင်မြင်မှုနဲ့ ငြိမ်းအေးခြင်းဘဝ။

          ကျွန်တော်မြစ်ဆိပ်ကို ကျောခိုင်းလိုက်မိတယ်။ လွယ်လွယ်ကူကူတော့မဟုတ်။ ကျွန်တော့်ရင်ထဲကနေ မျက်ဝန်းအိမ်ကတစ်ဆင့် ပါးပြင်ပေါ် ကျရောက်လာတဲ့ ပူနွေးနွေးမျက်ရည်စ ကျွန်တော်မသုတ်မိ။ ကျွန်တော့်ခြေထောက်တွေ ဆင်ခြေလျှောကုန်းတက်လေးအတိုင်း။ ကျွန်တော့်နောက်က နက်တိုးနဲ့ ရွှေဂဲက ထက်ကြပ်မကွာ။ ခြေလှမ်းတွေက အသံလေးရှိရာ လယ်ကွင်းပြင်တွေဆီ။ လေပြည်ရိုင်းတစ်ချက် တမင်ဆော့ကျီစယ်သလို ကျွန်တော့်ဆံပင်တွေ လွင့်ခါနေသလို လယ်ကွင်းပြင်က စပါးနှံတွေ ယိမ်းထိုးနေပြီ။

          ကျွန်တော့်ခြေလှမ်းတွေ မရပ်တန့်ပါ။ အဲဒီလိုပဲ ကျွန်တော့်ရင်ခုန်သံတွေလည်း…။


*          *          *

         


  မျက်ရည်ကြည်စလေးတွေက ကျွန်တော့်ပါးပြင်ထက်ဆီ ရောထွေးသွားတယ်။ ကျွန်တော့်ရင်တွေ လှိုင်းထနေတယ်။ အသံအိအိလေးတစ်ခု ငိုရှိုက်သံလေးတစ်ခု ကျွန်တော့်ရင်ခွင်ထဲမှာ နွေးထွေးအိစက်နေတဲ့ ပါးမို့မို့လေးကို အသာနမ်းရှိုက်လိုက်တယ်။ ရင်ထဲမှာ အေးမြတဲ့ ရေကြည်လေးတစ်ပေါက် စိမ့်ဝင်သွားသလို ခံစားရတယ်။ အပြင်မှာ မိုးတွေ ခပ်ပါးပါးကနေ ခပ်သဲသဲ ရွာချကုန်ပြီ။ အခုလောက်ဆိုရင် လှေကလေးမြစ်ငယ်မှာ လူးလွန့်နေပြီလား။

          သမီးလေးရဲ့ မျက်ရည်ကြည်လေးက ကျွန်တော့်နှလုံးသားတွေကို ဆို့နင့်စေတယ်။ ကျွန်တော့်ရဲ့ လက်မောင်းတစ်ဖက်ကို အားပြုဆုပ်ကိုင်လာတဲ့ လက်အစုံကို သတိထားမိလိုက်တော့ မိခင်ရဲ့လက်အစုံ။ ဒီလက်တွေက ဘဝမှာ ခပ်ကြမ်းကြမ်း ကူးခတ်ခဲ့ရတဲ့ လက်တွေ။ သြော် မိခင်ရဲ့ လက်သည်းတွေတောင် ရှည်နေပါပေါ့လား။ ကျွန်တော် ညှပ်ပေးနေကျ လက်သည်းတွေဟာ ညီပြီး တိတိရိရိလေး ရှည်လို့။ ကျွန်တော့် မေ့လျော့မှုကို မိခင်ရဲ့လက်သည်းတွေက သက်သေပြလို့နေတယ်။ မိခင်က ကျွန်တော့်လက်မောင်းတွေကို ပုတ်တယ်။ နောက်ပြီး ကျွန်တော့်ရင်ခွင်ထဲမှာ အိပ်ပျော်နေတဲ့ သမီးလေးကို ကြည့်တယ်။ နောက် အမေလည်း ပါးပြင်ပေါ်ကျလာတဲ့ မျက်ရည်တစ်စက်ကို ပခုံးပေါ်တင်ထားတဲ့ တဘက်ကြမ်းကြမ်းနဲ့ သုတ်လိုက်တယ်။ ကျွန်တော့်သမီးလေးနဲ့အမေ့ကို လက်တစ်ဖက်စီနဲ့ ဖက်ထားလိုက်မိတယ်။

          လွယ်မယောင်နဲ့ခက် တိမ်မယောင်နဲ့နက်တဲ့ သဘာဝတရားကြီးကြား ကျွန်တော် လူးလွန့်ခဲ့တယ်။ ဘဝဟာ ရေစက်ပေါင်းများစွာနဲ့ လာရောက်ထိတွေ့ခြင်းပဲဆိုရင် အဲဒီရေစက်တွေထဲက တစ်စက်ဖြစ်တဲ့ သမီးလေးနဲ့ ကျွန်တော့်ရဲ့ရေစက်၊ မေတ္တာအပြည့်၊ နွေးထွေးမှုအပြည့်။ သမီးလေးရဲ့ အမေ ကျွန်တော့်ရဲ့ချစ်လှစွာသော ဇနီးသည်လေးက သမီးလေးကို မွေးဖွားပြီး နှစ်လပဲရှိပါသေးတယ်။ နှစ်လလေးမှာ သူ အလုပ်လုပ်ချင်လို့ နိုင်ငံခြားကို ထွက်သွားခဲ့တယ်။ ကျွန်တော့်ရဲ့ တားမြစ်မှုအောက်ကနေ ရုန်းကန်ထွက်သွားတဲ့ သမီးလေး မိခင်။ ကျွန်တော် ပျာယာခတ်ခဲ့ပြီ။ ကြောက်လန့်စရာ အိပ်မက်တစ်ခုလို နံနက်မိုးလင်းတိုင်း သမီးလေးဘေးမှာ အမေမရှိတော့။ ချော့မြှူသံမရှိတော့။ နို့တိုက်ကျွေးမဲ့သူ မရှိတော့။ သမီးမျက်ရည်စက်ကို တိတ်စေမဲ့သူ မရှိတော့။ ကျွန်တော့်အတွက် ဘဝတစ်ခြမ်းမရှိတော့။ သူ ဘာဖြစ်လို့များ ဒီလိုလုပ်ရက်ပါလိမ့်ဆိုတာ မစဉ်းစားတတ်တော့။

          ထွက်သွားစဉ်က နှစ်လသမီး၊ အခု သမီးလေးက နှစ်နှစ်သမီး။ ကျွန်တော့် ဒုက္ခတွေအတွက် အမေက အကောင်းဆုံး ကူညီပေးခဲ့တယ်။ သမီးလေး လက်ကလေးတစ်ဖက်ဟာ မိခင်ရဲ့ ရောဂါတွေကို သက်သာစေခဲ့တယ်။ အဆက်အသွယ်ဆိုတာ လုံးဝမရှိခဲ့တဲ့ ဇနီးသည်ဟာ တစ်ဖက်နိုင်ငံမှာ အဆင်ပြေရဲ့လားလို့ ကျွန်တော် အကြိမ်ကြိမ်အခါခါ စဉ်းစားမိခဲ့တယ်။ ဘာပဲဖြစ်ဖြစ် အိပ်ရာဝင်ချိန်တိုင်း မေတ္တာပို့မိတယ်။ ကျွန်တော့် မေတ္တာတွေကြောင့်ပဲလား။ တစ်နှစ်ကျော်ကြာလာတဲ့အချိန်ကျမှ ဇနီးသည်ဟာ အလုပ်သွားလုပ်တဲ့ တစ်ဖက်နိုင်ငံမှာ သူဌေးတစ်ယောက်နဲ့ အိမ်ထောင်ကျပြီး ကလေးတစ်ယောက်တောင် ရနေပြီဖြစ်ကြောင်း သိလိုက်ရတယ်။ ကျွန်တော်ကတော့ ပြန်လာနိုး၊ ဆက်သွယ်နိုးနဲ့ မျှော်လင့်ခဲ့ရတယ်။ သမီးလေးနဲ့ ကျွန်တော့်ကို ခွဲခွာသွားနိုင်တဲ့ စိတ်ကို အံ့သြရင်း မထူးဆန်းတော့ပါဘူး။ လောကဓံကို ကျွန်တော်နဲ့ အတူတူ လက်တွဲလျှောက်ရဲတဲ့ သတ္တိ ခွန်အား သူ့မှာ မရှိလို့နေမှာပါလို့ တွေးမိတယ်။ မြန်မာပြည်ရဲ့ တစ်နေရာမှာ ကိုယ့်သွေး၊ ကိုယ့်သား၊ သမီးလေးရှိနေသေးတယ်ဆိုတာ သတိမှရပါလေစ။

          သမီးလေးက ကြီးလာတော့ သူ့အမေနဲ့ ချွတ်စွတ်တူနေတယ်။ သမီးလေးကို မြင်တိုင်း သူ့အမေကိုမြင်နေရသလိုပဲ။ လောကကြီးက ကျွန်တော့်ကို ဘာလို့ ဒီပြစ်ဒဏ်မျိုး ပေးခဲ့ရသလဲ။ အရင်တုန်းက စိတ်ထဲမှာ သူ့အမေ တစ်နေ့ပြန်လာမှာပါလို့ မျှော်လင့်ရင်း၊ နေဝင်ရင်း နောက်တစ်နေ့ရဲ့ မနက်ဖြန်တွေကို မျှော်လင့်ရင်းနဲ့ ရှင်သန်စေခဲ့တယ်။

          ပြန်မလာတော့ဘူးဆိုတာ သိလိုက်ရချိန်မှာ ကျွန်တော့်ရင်အစုံလုံး ခါးသက်နေခဲ့တယ်။ အိပ်မက်တွေခါးသလို မြင်မြင်ကရာ အကုန်ခါးသီးနေတော့တာပဲ။ ကျွန်တော့် လက်တွဲဖော်ဟာ ဘာဖြစ်လို့ သစ္စာမရှိခဲ့ရတာလဲ။ ဘဝကို ရုန်းကန်ပြီး မဖြတ်သန်းချင်တဲ့ ကလေးအမေက နောက်လှည့်မကြည့် သွားချင်တဲ့လမ်းဆီ ရှေ့သို့သာ ဦးတည်ခဲ့တယ်။ သွားပါရစေ မောင်ရယ်။ မောင်နဲ့ သမီးလေးအတွက်တဲ့လား။ သမီးလေးကို ဘဝမှာ ကောင်းကောင်းမွန်မွန်လေး ထားချင်လို့ပါတဲ့။

          ထွက်သွားတဲ့အချိန်ကစပြီး ကျွန်တော်နဲ့သမီး အတွက်ကတော့ ကောင်းကင်တစ်ခု ပျောက်ဆုံးခဲ့တယ်ဆိုတာ သူကတော့ သိမှာမဟုတ်ဘူး။ ကျွန်တော်ကတော့ ဒီကောင်းကင်ကြီး ဘယ်တော့ လင်းလာမတုံး၊ လင်းလာမတုံးနဲ့ စောင့်ကြည့်ရင်း အချိန်တွေကုန်ခဲ့ရပါတယ်။ နှလုံးသားရဲ့ တစ်စုံလုံးဟာ ကိုယ်လုပ်ချင်ရာ လုပ်သွားနိုင်ဖို့ အတ္တနဲ့ လဲလှယ်သွားခဲ့လေသလား။

          ခါးသီးတဲ့စိတ်တွေနဲ့ ကျွန်တော် လေလွင့်ခဲ့တယ်။ ကျွန်တော်တို့ တည်ဆောက်ခဲ့ကြတဲ့ ကမ်းခြေဟာ လွယ်လွယ်လေးမှ မဟုတ်ခဲ့တာ။ ရေနဲ့အတူ ပါလာခဲ့တဲ့ ဒိုက်တွေနဲ့ အမှိုက်သရိုက်တွေကို ဖယ်ရှားရင်း ဘဝတစ်ခုကို ခုလို မိသားစုလေးတစ်ခုရဖို့ ဘယ်လောက်ရင်းခဲ့ရသလဲ။ ကျွန်တော့်ရဲ့ အနီးဆုံး ဆွေမျိုးဆိုလို့လည်း အမေတစ်ယောက်ပဲ ရှိခဲ့တာပါ။ ဘယ်လိုပဲဖြစ်ဖြစ် သူကိုယ်တိုင်မွေးဖွားခဲ့တဲ့ သမီးလေးရဲ့ မျက်နှာကိုကြည့်ဖို့ ကောင်းခဲ့ပါတယ်။

          လောကကြီးက မထင်မှတ်တဲ့ အရာတွေပေးဖို့ အချိန်မစောင့်ခဲ့ဘူး။ ကျွန်တော့်ရဲ့ စိတ်ထွက်ပေါက်အတွက် အမေမကြိုက်တဲ့ အရည်တွေ သောက်ခဲ့တယ်။ အထီးကျန်လာတဲ့ စိတ်ဒဏ်ရာတွေကို ရေစိမ်ခဲ့တယ်။

          ကျွန်တော့်စိတ်တွေ ပြိုဆင်းလုလုနဲ့ သမီးလေးမျက်နှာမြင် အားပြန်တက်ရင်း ကျွန်တော့်အတွက် လေပြည်တွေကို မျှော်လင့်ခဲ့တယ်။ အိပ်မက်ဆိုးတွေက လှုပ်နိုးလူးလွန့်ဖို့ အချိန်များစွာ ပေးဆပ်ခဲ့ရတယ်။ ပျောက်သွားတာတော့ မဟုတ်ပါဘူး။ အနာစိမ်းလေးကနေ ကျက်ဖို့ ကျွန်တော် ကောင်းကောင်း မရင့်ကျက်ခဲ့ဘူး။ လောကမှာ တစ်ခါတလေ မထင်မှတ်တဲ့ အရာတွေဟာ ထောင့်ချိုးတစ်ခုကနေ ပေါ်လာတတ်တယ်ဆိုတာ လက်ခံလိုက်ရတယ်။

          ကျွန်တော့်ရဲ့ နှလုံးသားတွေကို အတန်ငယ်ရင့်ကျက်စေခဲ့သူ သူမက လေပြည်နဲ့အတူ ကျွန်တော့်ဘဝကို စာနာလာတယ်၊ ဖေးမလာတယ်။ သူမ ကမ်းလာတဲ့ လက်သွယ်သွယ်လေးကို ကျွန်တော် မဆုပ်ကိုင်ရဲခဲ့ဘူး။ သူမကတော့ သတ္တိကောင်းစွာ ကျွန်တော့်လက်မောင်းတွေကို မှီခိုအားပြုလာခဲ့တယ်။ ကျွန်တော်တို့နှစ်ယောက်ရှေ့က မြေနီလမ်းလေးထဲ တိုးဝင်လျှောက်လို့။ ကလေးချစ်တတ်တဲ့ ဆရာမလေးဟာ သမီးလေးကိုလည်း ချစ်ချစ်ခင်ခင် ကျွန်တော့်မိခင်အပေါ်မှာလည်း ရိုသေပြုစုလို့။

          သံယောဇဉ်ဆိုတဲ့ မမြင်နိုင်တဲ့ အမျှင်ပါးလေးကို ကျွန်တော်ကြောက်မိတယ်။ မျက်စိမှိတ်ရင်း တိုးဝင်မိကြတဲ့ သံယောဇဉ်ကနေ နယ်မကျွံမိအောင် ကျွန်တော့်ခြေလှမ်းတွေကို ပြန်ပြန်ရုပ်မိတယ်။ ကျွန်တော့်ဘဝကို သိထားတဲ့ သူမ မျက်ဝန်းက သနားနေတယ်ဆိုတဲ့ အရိပ်တွေ အုံ့မိုးလို့။ မသနားပါနဲ့။ ကျွန်တော် အသနားခံရတဲ့လူ မဖြစ်ချင်ဘူး။

          ကျွန်တော့်ရဲ့ ဥပေက္ခာကို ပါးပါးလေး ရသွားရုံရှိသေး။ သူမ ကျွန်တော့်ကို မုန်းသွားပါစေ အတွေးနဲ့ ခပ်ဝေးဝေးမှာ နေခဲ့တယ်။ ဒါပေမဲ့ ကျွန်တော် မထင်မှတ်စွာ သူမရဲ့ဆုံးဖြတ်ချက်နဲ့ ကျွန်တော့်အပေါ်ထားတဲ့ သဘောထားတွေကို သိရတဲ့အခါ ကျွန်တော့် ဥပေက္ခာကို မပြုရက်နိုင်တော့။ ငိုချက်လျက် လက်တို့ဆိုသလို ချော့လည်းချော့လိုက်ရော ကျွန်တော့်ရင်ခွင်ထဲမှာ သူမဟာ ကလေးတစ်ယောက်လို ငိုပါတော့တယ်။

          ကျွန်တော့်နှလုံးသားတွေ တုန်ခါနေခဲ့တယ်။ သူမရဲ့လွင့်နေတဲ့ ဆံပင်တွေကို ခပ်ဖွဖွနမ်းမိတယ်။ ပင်လယ်ဆီက တဝုန်းဝုန်းလှိုင်းတွေကလည်း ကမ်းစပ်ကို လာလာနမ်းတယ်။ သူမဟာ တစ်နေ့ကျရင် မြို့လေးဆီကို ပြန်သွားမှာပါ။ အဲဒီမြို့လေးမှာ သူမ ဖေဖေ ရှိသေးတယ်လေ။ ကလေးတွေ သူမကို ချစ်သလို ကျွန်တော်လည်း…

          ကျွန်တော့်ဘဝလေး သူမကြောင့် အတန်ငယ်စိုပြည်လာတယ်ဆိုရင် မမှားပါဘူး။ သမီးကလေးနဲ့လည်း လက်ပွန်းတတီး အမေက သိတယ်၊ ရိပ်မိတယ်၊ ကျွန်တော့်ကိုတားတယ်။ ကျွန်တော် ဘာမှ မဆုံးဖြတ်နိုင်သေးပါဘူး။

          အစကတော့ ကိုယ်တိုင်ဥပေက္ခာပြုထားတဲ့ ကျွန်တော်ဟာ သူမရဲ့ ဂရုစိုက်မှုတွေ ဖေးမလက်တွဲမှုတွေ၊ ချစ်စရာကောင်းတဲ့ ဟန်ပန် အပြုအမူတွေကြောင့် ကိုယ်တိုင် ရုန်းမထွက်နိုင်ခဲ့ဘူး။ အမေ့ရဲ့ စဉ်းစားပါဦး ငါ့သားရယ် အပျိုနုနုထွတ်ထွတ်လေးတစ်ယောက်က ကလေးတစ်ယောက်နဲ့ ငါ့သားကို ယူပါ့မလား။ သူလည်း တာဝန်ပြီးဆုံးလို့ ပြန်သွားရင် ပြီးသွားမှာပါ။ အခုကတည်းက မေ့လိုက်ပါ သားရယ်တဲ့။ အမေ့သားလေး ခံစားရမှာ စိုးလို့ပါတဲ့။ အမေ ဘာတွေတွေးပြီး ပြောနေမှန်းမသိခဲ့ဘူး။ သူမနဲ့ ကျွန်တော် မေတ္တာစစ်နဲ့ ချစ်ကြတာပါ။ ဒီအထဲမှာ အရောင်တွေ ဖွဲ့စည်းမှု အနိမ့်အမြင့်တွေ မပါခဲ့ဘူး။ ဒီလိုပဲ အမေ့ကို ပြောခဲ့တယ်။ ကျွန်တော် သူမကို ယုံခဲ့တယ်။ သူမနဲ့ လက်တွဲရင် မြို့တော့ လိုက်သွားရမယ်ဆိုတော့ အမေ့မျက်ရည်တွေ ဝိုင်းသွားတာကို ရိပ်မိခဲ့တယ်။

          တကယ်ပါပဲ။ သူမ မြို့ကို တစ်လတစ်ခေါက်လောက် ပြန်လေ့ရှိတယ်။ ဒီတစ်ခေါက်ပြန်လာတော့ သူမ ပုံစံတစ်မျိုးလေး ဖြစ်နေတယ်။ အိမ်ကိုလည်း သိပ်မလာတော့။ တွေ့တော့လည်း အေးတိအေးစက်လေး ကျွန်တော့်ကိုပဲ ကြည့်နေခဲ့တယ်။ မေးလို့လည်းမရ။ နောက်တစ်နေ့ မလာ မလာနဲ့ သူနေတဲ့ရွာထဲက နေရာလေးဆီ လိုက်သွားတော့ သူမ မြို့ကို အပြီးပြန်သွားပြီတဲ့။ ကျွန်တော် ငုတ်တုတ်ထိုင်မိရက်သား ဖြစ်သွားတယ်။ ဘာပစ္စည်းမှ မရှိတော့။ ကျွန်တော့်ကို ထားရစ်ခဲ့ပြီလား။ စာလေးတစ်စောင်တောင် ကျွန်တော့်ကို ပေးမသွားဘူး။ နှုတ်ဆက်မသွားဘူး။ ချစ်ပါတယ်ဆိုပြီး ရင်ခွင်ထဲကို ဝင်လာတဲ့သူမဟာ ခုတော့လည်း ကျွန်တော့်ရင်ခွင်ထဲက ထွက်သွားပြန်ပြီ။

          ကျွန်တော်မျှော်လင့်တဲ့ လေပြည်တွေဟာ ရိုင်းသွားပြန်ပြီလား ကျွန်တော် မစဉ်းစားတော့။ ဘာမှ မစဉ်းစားနိုင်တော့။ ကျွန်တော့် အိမ်လေးဆီပြေး၊ ကျောပိုးအိတ်ကိုယူလို့ မြစ်ဆိပ်ဆီ လှေဆိပ်ဆီ ပြေးခဲ့တယ်။

          ဘာဖြစ်လို့လဲ။ သူမ ကျွန်တော့်ကို တစ်ခုခုတော့ ပြောစေချင်တယ်။ ဒီအတိုင်းနေနေတဲ့ ကျွန်တော့်နှလုံးသားကို လေပြည်တွေနဲ့အတူ ဆော့ကစားခဲ့တယ်။ ကျွန်တော့် နှလုံးသားတွေ ကျစ်လျစ်ပြီး သူမအပေါ် အမှန်တကယ် ချစ်မိသွားပြီဆိုမှ ဒုတိယ မိုးကောင်းကင်က ကျွန်တော့်ကို နှုတ်မဆက်တော့။ ဘာဖြစ်လို့လဲ။ ဘာဖြစ်လို့လဲ။ အိပ်မက်တွေ ထပ်မံဆုံးရှုံးခဲ့ပြန်ပြီ။ ကျွန်တော်တို့ ခိုင်မြဲပါတယ်ဆိုတဲ့ လက်တွေ ဘာကိုယုံကြည်ရမလဲ။ ကျွန်တော့်အတွက် အဖြေမရှိတော့ဘူးလား။ ကျွန်တော့်ကို မချစ်တော့ရင်နေပါ။ အဖြေတစ်ခုကိုတော့ ထားခဲ့ပါ။

          ကျွန်တော် မြစ်ကြောင်းတစ်လျှောက်ဆီ ပြေးမိတယ်။ မြို့လေးမှာ ကျွန်တော့်ရင်ခုန်သံနဲ့အတူ ကျွန်တော့်အိပ်မက်တွေကို ပြန်လည်ရှင်သန်စေခဲ့သူ၊ ကျွန်တော့်နှလုံးသားက ခရီးနှင်နေပေမဲ့ နောက်ဆုံး ကျွန်တော် ပြိုလဲခဲ့ပြီ။ ခြေလှမ်းတွေ ရပ်တန့်ခဲ့ပြီ။ လှေကလေးက ရေလှိုင်းနဲ့အတူ လွတ်ထွက်ရင်း။

          ကျွန်တော့်နားဆီ ရိုက်ခတ်လာတဲ့ အသံစူးစူး သေးသေးလေး။ ကျွန်တော့်ရင်တွေ တဆတ်ဆတ်ခုန်အောင် ချစ်ခဲ့ရတဲ့ တစ်ဦးတည်းသော သမီးလေး။ လွန်ဆွဲပွဲမှာ ကျွန်တော့်နှလုံးသားကို အဲဒီ အသံလေးကပဲ သိမ်းပိုက်လိုက်တယ်။ ခြေလှမ်းတွေကို ချည့်နဲ့စေခဲ့တယ်။

          ကျွန်တော် အရမ်းသွားချင်နေတဲ့ မြို့လေးဆီ ဘယ်တော့မှ သွားဖြစ်တော့မှာ မဟုတ်ပါ။ ဘယ်တော့မှလည်း ရောက်တော့မှာ မဟုတ်ပါ။ ဒါကတော့ သေချာသွားခဲ့ပြီ။ နက်တိုးနဲ့ ရွှေဂဲ ကျွန်တော့်နောက်က ထပ်ကြပ်မကွာလိုက်ပါရင်း ပျော်နေကြသလို ဖြူစင်တဲ့ သမီးလေး ပျော်မယ်။

          အမေလည်း ပျော်မယ်။

          ကျွန်တော်လည်း နောက်ဆိုရင် ပျော်နိုင်သွားမှာပါ။

          ဒီအတွေးနဲ့ ကျွန်တော့်ရဲ့ အဝါရောင်သန်းနေတဲ့ အိမ်လေးဆီ ခြေလှမ်းတွေ အပြေးတစ်ပိုင်း ဦးတည်ခဲ့မိတော့တယ်။



ချောအိမာန် (မန္တလေး)

ရွှေအမြုတေ မဂ္ဂဇင်း (အောက်တိုဘာ၊ ၂ဝ၁၂)


2 comments:

myotthakoyin said...

A clear, smooth, simple and pure(no English words) myanmar prose (zagapyay) that pulls a reader right into its fast-moving , multi-dimension (the past failed marriage, a new fleeting pleasure and being a loving and caring father) and intense 'pu-du-zin'-the ordinary human-desires. The main message , I guess, is its redemption quality:self-realisation of the man in the end.

Junemoe said...

လွန် ဆိုတဲ့ အတိုင်း သမီးလေးနဲ့ အဆက်အသွယ်ပြတ်သွားခဲ့တဲ့ ချစ်သူနောက်ကို လိုက်ချင်ခဲ့တဲ့စိတ် နှစ်ခု လွန်ဆွဲပုံလေးကို ဖော်ကျူးရေးဖွဲ့သွားတာလေး...အရမ်းကြိုက်တယ် ဆရာမ။
ဒီလ ရွှေဝတ္ထုအားလုံးလိုလို အရမ်းကောင်းတယ်...။
ဆရာမ ရဲ့ နောက်ထပ် ၀တ္ထုတွေလည်း မျှော်လင့်လျက်...:)

ချစ်ခင်တဲ့