Tuesday, October 16, 2012

တစ်ရံရောအခါ








          ဒီဇာတ်လမ်းကို ပြန်ပြောရရင်… ဟိုးရှေးရှေးတုန်းကလို့ ပြောလို့မဖြစ်တော့ဘူး။ သိပ်မကြာသေးခင် တစ်ရံရောအခါကလို့ပဲ ပြောမှဖြစ်မယ်။ ယုံချင်လည်းယုံမယ်၊ ဟုတ်ပါ့မလားလို့ သံသယဝင်သူတွေလည်း ရှိချင်ရှိလိမ့်မယ်၊ အံ့သြတဲ့သူတွေလည်း ရှိမှာပါပဲ။ ဒီလိုပါပဲ လူ့လောကကြီးမှာ မယုံနိုင်စရာကောင်းတဲ့ ဖြစ်ရပ်တွေနဲ့ ပြည့်နှက်နေကြတာ ကျွန်မကိုယ်တိုင် ကြုံတွေ့သူ အစစ်မဟုတ်ဘူးဆိုရင် လွယ်လွယ်ကူကူနဲ့ ဘယ်လက်ခံလို့ရလိမ့်မတုန်း၊ လက်ခံယုံကြည်ဖို့ဆိုတာကလည်းနော်၊ စကားအပြောနဲ့ဆိုရင် ကျွန်မက ပေပြီး နားတစ်ဝက်ပိတ်ထားတုန်း၊ ကြားနေရတာ ကြာပြီပဲ…
          ဒီအကြောင်း ဒီဇာတ်လမ်းကို ယောက်ျားတွေကလည်း ပြောတယ်၊ မိန်းမတွေကလည်း ပြောတယ်။ ယောက်ျားပျိုတွေ ပြောသလို မိန်းမပျိုတွေကလည်း ရပ်ထဲရွာထဲ ပြောနေကြတယ်။ ကျွန်မက သူတို့ပြောတာတွေကို သေချာလိုက်နားထောင်တာမဟုတ်ဘူး။ ကျွန်မဆိုင်မှာ သွားရင်း၊ လာရင်း၊ စားရင်း၊ သောက်ရင်းနဲ့ ပြောပြောနေကြတာ တစ်နေ့မဟုတ်သလို၊ တစ်ယောက်မဟုတ် တစ်ယောက်ဆိုတော့ အလိုလို သိလာတာပေါ့။ အရင်ကလည်း ရပ်ထဲရွာထဲအကြောင်း ဒီလိုပဲသိလာတာပေမယ့် ဒီတစ်ခါ အထူးအဆန်းချည်း။
          ကျွန်မက အရက်ကို ခွက်ချိန်နဲ့ရောင်းတယ်။ အဲဒီလိုရောင်းတော့ ပုလင်းကလည်း အမြတ်ရ၊ အရည်ပေါ်မှာလည်း အမြတ်ရတယ်လေ။ အရက်သမားတွေကို ဖောက်သည်မလုပ်ချင်ပေမယ့် သူတို့နေ့တိုင်းလာသောက်လို့ ကိုယ့်မိသားစု ဝမ်းရေးအဆင်ပြေနေတာဆိုတော့ ဖောက်သည်တွေ ဖြစ်ရတာပဲ။ တစ်ဖက်က ကုန်စုံဆိုင်၊ တွဲလျက်က အသုပ်ဆိုင်ဖွင့်ထားတော့ မိန်းမအများစုကတော့ ညာဘက်အသုပ်ဆိုင်၊ ယောက်ျားအများစုကတော့ ဘယ်ဘက်က အရက်ဆိုင်၊ အလယ် ကုန်စုံဆိုင်ကတော့ လူဗြောက်သောက်။ လူအို၊ လူကြီး၊ ကလေး၊ မျက်မမြင်၊ အကျိုး၊ မုဆိုးဖို၊ တစ်ခုလပ်၊ ဘုန်းကြီး၊ မယ်သီလရှင် အကုန်ပါပေါ့။
          အဲဒီတော့ ကျွန်မဆိုင်လောက် လူစုံတာ ဘယ်မှာရှိတော့မလဲ။ ဆိုင်မှာလာဝယ်သူအချင်းချင်းဆုံရင် ဆန်ဝယ်၊ ဆီဝယ်နဲ့ တော်တော်နဲ့မပြန်ကြတော့ဘူး။ စကားစတည်းချတော့ တစ်ခါတလေများဆို အိမ်ကလူတွေ လိုက်ခေါ်ကြရတယ် အမေဆန်သွားဝယ်တာ ခုမှ စပါးရိတ်တုန်းလား။
          ခရမ်းချဉ်သီးလေးလိုလို့ ချက်ချင်းဝယ်ခိုင်းလိုက်ပါတယ်၊ ပေါ်မလာတော့ဘူးဆိုပြီး တုတ်တစ်ချောင်းနဲ့ ရိုက်ခံထိပြီး ဆူညံသွားတဲ့အခါလည်း ရှိရဲ့။
          ဆိုင်မှာစကားပေါနေလို့ အာလူးအစိတ်သားဝယ်ခိုင်းတာကို ငါးဆယ်သားဝယ်သွားလို့ ဆူခံရသူတွေနဲ့။
          ဟုတ်ပါတယ်။ ကျွန်မဆိုင် ရောက်လာတဲ့ လူတွေအားလုံးလိုလို စကားများတဲ့လူတွေချည်းပဲမို့ ဘယ်သူနဲ့တွေ့တွေ့ စကားလက်ဆုံကျနေတာချည်းပဲ။ တစ်ခါတလေ ဝယ်သွားပြီးလို့ ဆိုင်အပြင်ရောက်နေပြီ တံခါးပေါက်နားမှာ နှစ်ယောက်သား ပြောလို့မဆုံးနိုင်ဘူး။ ရွာထဲက ဒေါ်စူးနဲ့ မပူတူးတို့ဆို အဆိုးဆုံး၊ ပြောနေလိုက်ကြတာများ မြိန်ရေရှက်ရေ။ ရပ်ထဲ၊ ရွာထဲ၊ သာရေးနာရေးရှိရင် ပိုဆိုး။ ဘယ်သာရေးကဘယ်လို၊ ဘယ်နာရေးကဘယ်လိုနဲ့ သူတို့ဆီက ကြားရတာ အဲဒီသာရေး၊ နာရေးမှာ သူတို့ကိုယ်တိုင် ကန်ထရိုက်ယူထားသလိုမျိုး။ အားလုံး သူတို့ကပဲသိ။ ဟုတ်တာတွေရော မဟုတ်တာတွေရော။
          ညနေငါးနာရီလောက်ဆို အရက်ချိုးလေးတွေ စီစီ…စီစီ နဲ့ ရောက်လာကြတယ်။ အလာတုန်းက ခြေလှမ်းကမှန်မှန် အပြန်ကျ ခြေချင်းတွေ လိမ်လို့။ အရည်မဝင်တော့ လေသံကတစ်မျိုး၊ မှန်လာပြီဆို ကြားရပါပြီ ဇာတ်လမ်းတွဲတွေ၊ မကြားချင်ပေမယ့်လည်း ကျွန်မထိုင်တဲ့ ကောင်တာနဲ့နီးနေတော့ ကြားရတာပါပဲ။
          ကျွန်မကောင်မလေးတွေကတော့ သူတို့တွေလာရင် ထုံးစံအတိုင်း ဝက်ခေါက်ကြော်ဟင်းရည် လုပ်ပေးရတယ်။ ရေနွေးပူပူထဲ ချဉ်စော်ကားသီးဟင်းရည်ထုပ် နှစ်ရာတန်လေးကို ဖောက်ထည့်၊ ဝက်ခေါက်ကြော်ကိုထည့်၊ ငရုတ်ကောင်းလေးတစ်ပေါက်နှစ်ပေါက် ပေါက်ပြီးရင် ရာသီဥတုအေးအေးမှာ အရသာတွေ့စေမယ့် ဟင်းရည်ပူပူတစ်ခွက်က အရက်သမားတို့အကြိုက်။
          ဟင်းရည်ပူပူကို ရှလွတ်၊ ရှလွတ်နဲ့ အသံမြည်အောင်သောက် အရက်ခွက်လေးကို အရသာခံမော့၊ နောက်ပြီးရင် သူတို့တစ်နေ့တာ သိခဲ့တဲ့အကြောင်းတွေကို အရည်ရော၊ အဖတ်ရောစားပြီး အရည်မရ၊ အဖတ်မရ သူတို့ပြောတတ်ပါပေတယ်။ တစ်ခါတလေ နေ့လယ်က ကြားတဲ့အကြောင်းအရာနဲ့ ညမှသိရတဲ့ အကြောင်းအရာက တူညီနေတတ်ပြန်တယ်။
          မိသားစု စီးပွားရေးကြောင့်သာ လုပ်နေရပေမယ့် တချို့ကို မျက်စိမှိတ်နေရတယ်။ သူတို့က လူလေးသုံးလေးယောက် စုမိရင် ဆယ်ယောက်လောက်စုပြောနေသလို ပြောနေကြတာ။ နဂိုက အာကျယ်တွေဆိုတော့ ပိုဆိုးတာပေါ့။ အိပ်ချင်နေလည်း ဝင်မအိပ်ရဲဘူး။ ဘယ်လောက်များ ဆိုးသလဲဆိုတော့ တစ်ခါတုန်းက ကျွန်မရဲ့ ငါးနှစ်သားကလေးရဲ့ ပါးစပ်ထဲ သူတို့သောက်နေတဲ့ဟာတွေ တိုက်လိုက်တာ… မူးလို့ အတော်အော်ဟစ်လိုက်ရတယ်။ ကလေးကို ချစ်လို့၊ ခင်လို့ လုပ်ပေမယ့် မဖြစ်သင့်တဲ့ ကိစ္စမဟုတ်ဘူးမှုတ်လား။ ဒါပေမဲ့လည်း စိတ်ကအကြာကြီး ဆိုးလို့ မရပြန်ဘူး။ နေ့တိုင်း ပိုက်ဆံလာပေးနေတာ ဆိုတော့လေ…။
          အဲဒီ အရက်ချိုးတွေက ခွင့်လွှတ်ရခက်။ စိတ်ဆိုးရခက်။
          မျက်မမြင်တွေကတော့ ကျွန်မဖောက်သည် အစစ်တွေဖြစ်လို့ လုံးဝစိတ်ဆိုးလို့ မရတဲ့ ဖောက်သည်တွေပါ။ မျက်မမြင်တွေက သူတို့အချင်းချင်း အဖော်လုပ်ပြီးလာကြတယ်။ ကောင်တာထဲမှာရှိတဲ့ ဖိနပ်တွေကို သူတို့လက်တွေနဲ့ ဟိုစမ်းဒီစမ်းနဲ့ ဝယ်သွားပြီး ကျွန်မကောင်တာထဲစီထည့်ထားတဲ့ ဖိနပ်တွေ မှောက်တဲ့ဟာမှောက်၊ လှန်တဲ့ဟာကလှန်နဲ့ ဖိနပ်တွေ ဗွက်ထသွားတော့တယ်။ ပြန်စီလိုက်၊ ပြန်ဖွလိုက်နဲ့ ဖြစ်နေတော့ ဆိုင်က ကောင်မလေးတွေက မစီချင်တော့ဘူး။ မျက်မမြင် အများစုက ကျွန်မဆိုင်ကပဲ ဝယ်ကြတာလေ။
          ကြားနေတာကြာပြီဖြစ်တဲ့ ရှေ့ကပြောခဲ့တဲ့ တစ်ရံရောအခါ အကြောင်းကို ပြန်ဆက်ရရင် အတော့်ကို ထူးဆန်းသား။ ဒီလို… အဲဒီ အရက်သောက်တဲ့သူတွေဆီက စတိုင်အတိုင်းပြောရရင် သူတို့ပြောနေတဲ့ ဇာတ်လမ်းထဲမှာ သူတို့ကိုယ်တိုင် ရောက်နေတဲ့အတိုင်းပဲ။ သူတို့ကိုယ်တိုင် ပါဝင်ခံစားနေရသလို ပြောနေလိုက်တာများ အမြင်တော်တော်ကပ်စရာအကောင်းသား။ ဒါကြောင့် သူတို့ပြောတာတွေကို မဟုတ်နိုင်တာတွေကို တွန်းပြောလို့ စိတ်တောင်တိုမိတယ်။ မိန်းမဈေး ပျက်အောင် တစ်ဆိတ်ကို တစ်အိတ်လုပ်ပြော၊ ဆန်စေ့လောက်ကို မြေပဲစေ့လောက် ဖြစ်အောင် ပြောကြတော့ ကိုယ်ကလည်း မိန်းမဆိုတော့ မိန်းမဘက်က မခံနိုင်ဘူးပေါ့။
          လောကမှာ ခယ်မနဲ့ ငြိကြတဲ့ဇာတ်လမ်း ဘာထူးဆန်းလို့လဲ။ ကလေးတွေပြောတဲ့ ခယ်မဆိုတာလိုက်ပွဲဆိုတဲ့ စကားတောင် ရှိသေးတာပဲ။ ညီအစ်မနှစ်ယောက်လုံးကို တစ်အိမ်တည်းမှာ ယူထားတာတွေလည်း ပြည့်လို့။ ခုဇာတ်လမ်းကတော့ ယောက္ခမနဲ့ သမက် ဇာတ်လမ်း။ ဒီအထိကို ဖြစ်ချင်ဖြစ်နိုင်တာပဲလို့ နောက်ဆုံးအဆင့်လို့ ပြောလို့ရပေမယ့် အခုလက်ရှိ ယောက္ခမကြီးအသက်က ခုနှစ်ဆယ် ကျော်နေပြီ။ သူ့သမက်က ရှိလှမှ သုံးဆယ့်ငါး၊ သုံးဆယ်ခြောက်ပေါ့။ အဘွားကြီးက ခါးကုန်းနေပြီ၊ ပါးကချိုင့်လို့ ဒီကိစ္စဖြစ်မှ မဖြစ်သင့်တာ။ အဘွားကြီးက သမီးကိုတောင် ဂရုမစိုက်ဘဲ သမက်လေးအပေါ် အကြင်နာတွေပိုပြနေတာတဲ့။ သမက်ကတောင်းလိုက်ရင် ရှိသမျှ ပိုက်ဆံထုတ်ပေးတယ်။ အဲဒီအတွက် အဘွားကြီးစိတ်ကြိုက် ပြုစုပေးရတယ်။ သမီးဖြစ်သူကလည်း အေးလွန်းတော့ မသိချင်ဟန်ဆောင် ပေးနေတဲ့ပုံပဲတဲ့။
          မနက်ခင်းစောစောဆို အဘွားကြီးအရင်ထ၊ မီးဖိုချောင်ထဲမှာ ရေနွေးအိုးတည်နဲ့ လုပ်စရာရှိတာ ရှာဖွေလုပ်နေချိန်ဆို သမက်တော်က ခြင်ထောင်ကို အသာမ မီးဖိုချောင်သွားပြီး အဘွားကြီးနဲ့ တိတ်တိတ် ကြူတော့တာပဲ။ ဒါမျိုးကလည်း တစ်ရက်တည်းမဟုတ်တော့ သူ့သမီးမအေးပိုင်ကလည်း သိပြီပေါ့။ ရေတွင်းမှာ ရေချိုးရင်လည်း မိန်းမကို ရိုးရိုးရေခပ်ပေးပေမယ့် အဘွားကြီးကိုတော့ ကျောပေါ်ကနေ လောင်းပေးတယ်။ အဘွားကြီးကလည်း အမြဲပြင်ပြင်ဆင်ဆင်နဲ့ မွှေးမွှေးကြိုင်ကြိုင် နေတတ်တယ်။ သွားတချို့ မရှိတော့ပေမယ့် အဘွားကြီးတစ်ယောက်အနေနဲ့ ကြည့်ရင်တော့ ဘုရားသွားကျောင်းတက်နဲ့ဆို အတော်ကျက်သရေရှိတဲ့ ရုပ်ရည်ရူပါပါ။ သူ့သမီး အေးပိုင်ကတောင် သူ့အမေကို မမီဘူး။ ခုတော့ အဘွားကြီးက ခုနှစ်ဆယ်ကျော်မှ ကိုယ့်အိမ်က သမက်နဲ့ဆိုတော့ ကြားလို့မှ မယုံနိုင်စရာပါ။ မအေးပိုင်က အရှက်ကြီးလို့လား၊ တစ်ဖက်က အမေ၊ တစ်ဖက်က ယောက်ျားနဲ့ ကြားညှပ်နေတဲ့ပုံပဲတဲ့။ ဒီအကြောင်းအရာတွေကို ပြောနေကြတာ ကြာပါပြီ။ အဲဒီ သမက်နေရာက ကြည့်ရင်လည်း အံ့သြဖို့ကောင်းတယ်။ အဘွားကြီးနဲ့ ဇာတ်လမ်းကို မအေးပိုင်ကလည်း ဘာဖြစ်လို့ ခွင့်ပြုထားတာလဲ။ ကိုယ့်မှာလည်း သမီးလေးတစ်ယောက်နဲ့။
          ဒီလိုနဲ့ ဒီသတင်းကြီး ရပ်ထဲရွာထဲ မွှေးပျံ့လာလိုက်တာ ဟိုးလေးတကြော်ကြော်ဆိုပါတော့။ မအေးပိုင် ဆိုင်ကို တစ်ခါတလေ ဈေးဝယ်လာတတ်တယ်။ သူ့စိတ်ကို လှမ်းကြည့်တာ စိတ်ဓာတ်တွေများ ကျနေမလား။ ဘာမှမသိတာလည်း မဖြစ်နိုင်။ မအေဆီက လက်မဖြန့်နိုင်တော့ ယောက်ျားကတစ်ဆင့်တောင်းပြီး ငွေကြေးကို ဆန်ခါနဲ့ စစ်သုံးစွဲနေရတယ်လို့ ပြောလားပြောရဲ့။ ဒါပေမဲ့ ဒီဇာတ်လမ်းကြီးကို ဒီလိုပဲ ဇာတ်လမ်းရှည်ကြီး ရိုက်ပြီး ပြီးသွားမှာလား၊ ကျွန်မအတွေးတွေနဲ့ ရှုပ်ထွေးလာတယ်။ ခုနက် အရက်သောက်လာတဲ့ ပေစီတို့ အုပ်စုကို မနေနိုင်လို့ မေးမိပါတယ်။ သူတို့ကလည်း ဒီအကြောင်းကို ပြောနေကြတာကိုး။
          "မလေးကြည့်ရတာ မယုံတစ်ဝက်၊ ယုံတစ်ဝက် ဖြစ်နေပုံရတယ်။ ပေစိပြောပြမယ်။ ပေစိမနေ့က ဝါးတောထဲမှာ အဘွားကြီးနဲ့ သူ့သမက် ချိန်းတွေ့တာကို တွေ့ခဲ့တယ်ဗျာ။ ညနေစောင်း မှောင်ရီဖျိုးဖျပေါ့ဗျာ။ ပေစိမျက်လုံးက ဒါမျိုးဆို သိပ်လျင်တာ သိတယ်မဟုတ်လား။ သဲသဲကွဲကွဲ သိချင်မြင်ချင်လာတာနဲ့ တိတ်တိတ်ကလေး ဝါးတောအနားကပ်ရင်း၊ ကပ်ရင်း ချောင်းကြည့်တာ ဟီး"
          "ဟဲ့… ဘာတုန်း"
          "ဟော… မလေး သိချင်နေပြီမဟုတ်လား။ ပေစိလိုပဲ"
          "အေးပေါ့… နင်က အူယားအောင် လာလုပ်နေတယ်"
          "ခြေသံကို ဝါးရွက်ခြောက်တွေပေါ် မနင်းမိအောင် လျှောက်ရင်း သူတို့နဲ့ သိပ်မကွာတဲ့ နေရာအနေအထားမှာ အတိအကျ နေရာယူပြီး အပီအပြင် မြင်ကွင်းကိုယူ"
          "အမယ်လေးဟဲ့… လိုရင်းကို မရောက်တော့ဘူး"
          "လာမယ်လေ၊ ပေစိ ခံစားရတဲ့အတိုင်း ပြောပြတာ အသံတွေပါ ကြားရတာ"
          "ဟဲ့… ဘာသံလဲ"
          "သြော်… စကားသံပေါ့။ အဘွားကြီးက တိုးတိုးတိုးတိုးနဲ့ အပျိုဖြန်းလေးအတိုင်းပြောနေတာ။ ဟိုကောင်ကလည်း အီတီတီ ချွဲတဲတဲ အသံနဲ့။ အဘွားကြီးရဲ့လက်ကို ဆုပ်ကိုင်ထားတယ်။ အဘွားကြီးက သွားမှ အကုန်မရှိတော့တာ၊ ရှက်ရယ်ရယ်လည်း သွားကြားထဲက လေတွေထွက်ပြီး တရှီးရှီးနဲ့"
          "ဟဲ့… နင်ကလည်း ရယ်စရာကြီး"
          "ဟုတ်ပါတယ်ဆိုမှ၊ ပေစိတွေ့သမျှ အတွဲတွေထဲမှာ ဒီအတွဲက စိတ်ဝင်စားစရာ အကောင်းဆုံးပဲ။ နောက်ပြီး အဘွားကြီးရဲ့ ပါးချိုင့်ချိုင့်ကြီးတွေကို ကျော်စွာက မွှေးတော့တာပဲဗျာ"
          "ဟယ်… နင်မြင်တယ်ပေါ့"
          "မြင်တာပေါ့ဗျာ။ အဘွားကြီးပါးကြီး ပိုပိုချိုင့်လာမှာ မြင်ယောင်သေးတယ်။ အဘွားကြီးကလည်း လူအိုစော်နံမှာစိုးလို့ ရှင်မတောင်လိမ်းထားတယ် ထင်ပါ့"
          "ဒါဆိုရင်လည်း ဒီကိစ္စကြီးက တကယ်ပေါ့နော်"
          "သြော်… ကျားကိုက်ပါတယ်ဆိုမှ အပေါက်ကလေးနဲ့လား မေးနေသေးတယ်။ ပေစိတို့ မညာတတ်ဘူး၊ အပိုတွေလည်း ထည့်မပြောတတ်ဘူး။ မအေးပိုင်ကြီး သနားပါတယ်"
          "သူတို့ကြားမှာတော့ ပြဿနာရှိမှာပေါ့"
          "ပေစိသိတာ တစ်ခုတော့ ရှိတယ် ဟုတ်မဟုတ်တော့မသိဘူး။ မအေးပိုင်က အဘွားကြီး နောက်ယောက်ျားနဲ့ ရတာဆို"
          "ဟုတ်လား ငါမသိပါဘူး"
          "သမီးအရင်းတောင် ဟုတ်ချင်မှ ဟုတ်မှာနော်"
          "ငါတော့ အရင်းထင်ပါတယ်"
          "အရင်းဆိုရင် ကိုယ့်သမီးကို စိတ်ဆင်းရဲအောင် လုပ်ပါ့မလား"
          "အေးဟာ… ဒါပေမဲ့ ဟိုကောင်က အကြံသမားဆိုတော့ သူ့မှာလည်း အပြစ်ရှိတာပဲ"
          ပေစိကတော့ သူမြင်ရာကို ဖောက်သည်ချနေတာ သေချာတယ်။ ပေစိမပြန်ခင် ပြောသွားတာလည်း ကြည့်ဦး…
          "အဘွားကြီးနဲ့ဆို ပိုက်ဆံမကုန်ဘဲ ပိုက်ဆံရတယ်လေဗျာ" တဲ့
          ခက်တော့ခက်ပါတယ်။ အစက ဒီသတင်းကို သိပ်စိတ်မဝင်စားပေမယ့် နောက်ပိုင်းတော့ နားစိုက်ထောင်မိတဲ့အဖြစ် အမေကလည်း သိတော့…
          "ဒီလိုတွေ မသင့်တော်တာ၊ မဖြစ်သင့်တာတွေ ဖြစ်တယ်ဆိုတာ ဝဋ်ကြွေးပေါ့အေ။ အဲဒီ အဘွားကြီးက အရင်တုန်းက သူများသားသမီးကို မှိုချိုး၊ မျှစ်ချိုး ပြောတယ်လေ။ မျက်မမြင် အနှိပ်သည် မနိုင်ကိုဆို ရစရာမရှိဘူး ပြောတာ"
          အမေပြောမှ ဟုတ်ပါရဲ့။ မနိုင်က မျက်စိမမြင်တဲ့ သူနဲ့ ရည်းစားဖြစ်တယ်လို့ ကုန်းတိုက်လို့ မနိုင်အမေက မနိုင်ကို လိမ့်နေအောင်ရိုက်တာ၊ မနိုင်က အသက်လေးဆယ်နားနီးမှ မျက်မမြင် ကျောင်းဆရာတစ်ယောက်နဲ့ ရည်းစားဖြစ်ပြီး ယူမယ့်အဆင့်အထိဖြစ်တော့ အဲဒီအဘွားကြီးက
          ဘယ်လိုလုပ် ဖြစ်နိုင်မှာလဲ။ မနိုင်က ကိုယ်ဝန်ယူမယ်ဆိုတော့လည်း မျက်မမြင်ချင်းရပြီး ကလေးမွေးရင် အကန်းလေးပဲ မွေးမှာလို့ အမနာပ ပြောရဲ့…
          မနိုင် မင်္ဂလာဆောင်ကို ရှေ့ဆုံးကသွားပြီး အတင်းပြောတာ။
          သူတို့ မျက်မမြင်ချင်း နှလုံးသားနဲ့ မေတ္တာစစ်လို့ လက်ထပ်ပြီး ယူဖြစ်တဲ့အထိ ဖြစ်သွားတာကို မုဒိတာ မပွားပေးနိုင်ခဲ့ဘူး။
          အားလုံးက မနိုင်ကို စိုးရိမ်ပေမယ့် ဖွင့်တော့ သိပ်မပြောခဲ့ကြဘူး။
          ကလေးဒုက္ခကို မနိုင် ဘယ်လိုခံမလဲ၊ စောင့်ရှောက်မလဲ၊ ပူပင်ခဲ့ကြပေမယ့်၊ မနိုင်ကတော့ ဘုရားမှာ ဆုတောင်းပြီးတော့ ကလေးယူခဲ့တယ်။ မနိုင် အဲဒီတုန်းက ပြောတာကို မှတ်မိသေးတယ်…
          "ကျုပ်ရမယ့် ကလေးကို ခိုင်းစားဖို့ မဟုတ်ပါဘူး။ ပညာရအောင် သင်ပေးမှာပါ။ တစ်နေ့ကျရင်တော့ ကျုပ်လက်လေးကို ကိုင်ဆွဲပေးမယ့် သမီးလေးဖြစ်ရင် တော်ပါပြီ။ ကျုပ်မှာ ယုံကြည်ချက်ရှိတယ်။ ကျုပ် အနှိပ်နှိပ်ပေးတယ်။ အကြောပြင်ပေးတယ်။ ကလေးမရနိုင်တဲ့သူတွေကို ရအောင်လုပ်ပေးတယ်။ သားအိမ်ကို ပြင်ပေးတယ်။ သားအိမ်ကိုတည့်ပေးတယ်။ အကြောပြင်ပေးတယ်။ သိပ်မကြာခင် ကလေးရသွားကြတယ်။ ကျုပ် ကလေးဖျက်တဲ့ အလုပ်ကို လုပ်တာမဟုတ်ဘူးလေ၊ ကလေးရအောင် လုပ်ပေးတာဆိုတော့ ကျုပ် ကလေးရနိုင်ပါတယ်။ ကျုပ်လည်း အဲဒီလိုပဲ ဆုတောင်းပါတယ်"
          မနိုင် ဆုတောင်းပြည့်ခဲ့တယ်။ မနိုင် ယောက်ျားကလည်း မနိုင်ဆီက အနှိပ်ပညာ ပြန်သင်ပြီး ဝင်ငွေပိုရှာတယ်။ စိတ်ကောင်းရှိတဲ့ မနိုင် အိမ်ထောင်ကျပြီး မကြာမီမှာ ကိုယ်ဝန်ရလာတယ်။ အဲဒီ ကိုယ်ဝန်ကို ဖျက်ခိုင်းတဲ့သူက ဖျက်ခိုင်းကြတယ်။ ဒါကလည်း မနိုင် ဒုက္ခရောက်မှာ စိုးလို့လည်းပါတယ်။
          ပေစိက ဒီနေ့ အရက်မသောက်ဘဲ ကျွန်မနားလာပြီး ရစ်သီ ရစ်သီနဲ့ ဈေးဝယ်ကလည်းကျနေတာမို့ ကျွန်မ စကားပြန်မပြောနိုင်ဘူး။ ဈေးဝယ်ရှင်းသွားမှ…
          "ဟဲ့… ပေစိ ဘာယူမလို့လဲ"
          "ဘာမှ မယူပါဘူး ပြောစရာရှိလို့"
          "ဘာကိစ္စလည်း ပိုက်ဆံချေးမလို့တော့ မဟုတ်ပါဘူးနော်"
          "မလေးကလည်း တစ်ခါလေးချေးဖူးတာနဲ့"
          "ကဲ… ဘာလဲ ပြော"
          "မညာကြေးနော်"
          "အေးပါ။ ရစ်နေပြန်ပါပြီ"
          "မလေး မနေ့က ဝါးတောထဲကို ကုပ်ချောင်းကုပ်ချောင်း ဝင်သွားတယ်ဆို"
          "သေနာလေး… နင့်ကို ဘယ်သူပြောလဲ"
          "မဟုတ်ဘူးလား"
          "တိုးတိုးပြော… အမေကြားရင် ဆဲလိမ့်မယ်"
          "ပြောစမ်းပါ"
          "ဟုတ်တယ်။ ဒါပေမဲ့ ငါက ဘုန်းကြီးကျောင်းက ပြန်လာတာ။ နင်တို့လို ချောင်းတာမဟုတ်ပါဘူး။ ကုပ်ချောင်း မလုပ်ပါဘူး"
          "ဘာပဲဖြစ်ဖြစ် ဘာတွေ တွေ့ခဲ့လဲ"
          "ငါ တစ်ညလုံး အိပ်မပျော်ဘူး"
          "ဘာဆိုင်လို့လဲ"
          "မအေးပိုင်နေရာမှာ ဝင်ခံစားမိလို့ပါ"
          "ပေစိ တွေ့သလိုပဲလား"
          "အေးဟယ်… ငါ့မြင်သွားရင် မကောင်းဘူးလေ… ဒါနဲ့ မြန်မြန်ပြန်လာရတာပေါ့"               
          "ယုံပြီလား"
          "အင်း… ငါ့မျက်စိနဲ့ မြင်မှတော့ မယုံချင်လည်း ယုံရတော့တာပေါ့"
          "အဘွားကြီးက သတ္တိကောင်းတယ်လို့ ပြောရမယ်"
          "ပေစိရယ် အဲဒါ သတ္တိကောင်းတာလား။ အရှက်၊ သိက္ခာမရှိ"
          "အသံကြားသေးလား"
          "ဘာသံလဲ"
          "ချွဲသံလေ"
          "အေးဟေ့… ဟိုလိုချွဲသံတော့ မဟုတ်ဘူး။ အဘွားကြီး ချွဲဟပ်သံတော့ ကြားရတယ်။ သွား ပေစိ ထပ်မမေးနဲ့တော့။ ငါ့ကို ဘယ်သူမြင်တာလဲ"
          "မြင်တဲ့သူက ပြောလို့ သိတာပေါ့ဗျ။ ကဲ…ကဲ…သွားပြီ"
          ပေစိထွက်သွားမှ သက်ပြင်းချမိတယ်။
          မနေ့က အဟုတ်ပါပဲ။ ဖြတ်လမ်းဖြတ်တဲ့ ဝါးတောနားက ဖြတ်လိုက်တာ အဘွားကြီးနဲ့ မအေးပိုင် ယောက်ျားကို တွေ့တော့တာပဲ။ သူတို့ကတော့ မမြင်ဘူးပေါ့။
          တရားထိုင်ရမယ့်အရွယ်မှာ ငြိတွယ်နေတဲ့ ဇောအရှိန်တွေကြောင့် အဘွားကြီးရော ကျော်စွာပါ မျက်နှာကြည့်ရတာ ယခင်လို ကြည်လင်မှုမရှိ။
          ကျွန်မရင်တွေ တဒိန်းဒိန်း တုန်လာခဲ့လို့ အိမ်ရောက်တော့ ရေခဲရေအေးအေးကို မြန်မြန်သောက်လိုက်ရတယ်။ တစ်နေ့လုံး သူတို့ဇာတ်လမ်းတွေ ရှေ့ဘယ်လိုဆက်ကြမလဲပေါ့။ ပြဇာတ်ရှည်ကြီး တစ်ပုဒ် ကနေရသလို ပင်ပန်းနေမှာက မအေးပိုင်လား။ ဘဝမှာ ဘာပဲဖြစ်ဖြစ် ယောက်ျားသားအတွက် ခွင့်အလွှတ်နိုင်ဆုံးသူတွေက မိန်းမတွေပါပဲ။ ဒါကို မငဲ့ညှာပဲ စော်ကားရုံတင်မက ရက်စက်လွန်းရာ ကျလွန်းမနေဘူးလား။ ခွင့်လွှတ်သည်းခံတယ်ဆိုတာ တကယ်တော့ ကိုယ့်စိတ်ကို ဒဏ်ရာကြီးကြီး ရမသွားအောင် ဖြေသိမ့်နည်းတစ်မျိုးပါ။ မိန်းမတိုင်းတော့ မလုပ်နိုင်ပါဘူး။ တစ်အိမ်တည်းမှာ မျက်နှာပြဝံ့နေတဲ့ လူသုံးယောက်ရဲ့စိတ်ကို ကျွန်မကတော့ ဘယ်လိုမှ မမှန်းဆနိုင်ခဲ့။
          ဘေးမှာ အိပ်နေတဲ့ ကျွန်မသားလေးကို တစ်ချက်ပြန်ကြည့်တော့ သူ့အဖေအတိုင်းပဲ။ သူ့အဖေက သူ့ကိုယ်ပွားလေး ကျွန်မကို ပေးခဲ့တယ်လေ။ ခင်ပွန်းသည်ကတော့ အမေ့အပေါ်မှာ သူ့အမေလို ဂရုတစိုက်ရှိလှတယ်။ ဒါကြောင့် ပတ်ဝန်းကျင်မှာ သမက်က သားဖြစ်ပြီး၊ သမီးက ချွေးမဖြစ်နေတာလို့ ကြေညာတယ်။ ကျွန်မအနေနဲ့ စိတ်ဆိုးစရာမရှိပါဘူး။ တကယ်ပဲ ပတ်ဝန်းကျင်ချီးကျူးရအောင် မိသားစုအပေါ် ကောင်းခဲ့တယ်။ ဘဝမှာ အိမ်ထောင်ဖက်ကောင်းရတာဟာ ထီထိုးရတာနဲ့ အတူတူပဲ။ ထီပေါက်တဲ့သူ အလွန်ကံကောင်းသလို မိန်းမတွေအတွက် ကံကောင်းဖို့ ခင်ပွန်းကောင်းရဖို့ အရေးကြီးဆုံးပဲ။
          လင်ဆိုးမယား တဖားဖားတွေ ရပ်ထဲရွာထဲအပြည့်။ ခင်ပွန်းသည်ဟာ ဇနီးမယား မိသားစုအပေါ် ကြင်နာတတ်သလို တာဝန်ယူသိတတ်မှုလည်းရှိ၊ အရက်သေစာလည်း ကင်းတယ်။
          ခုလို သစ္စာမရှိတာထက်.. အသိတရားမရှိခြင်းက ပိုပြီး မိုက်မဲလှတယ်။ ကာမဆိုတဲ့ ပိတ်မှောင်နေတဲ့ အမှောင်ကမ္ဘာကြီးထဲမှာ ပင့်ကူအိမ်မှာ အစာမိနေသလို ဘယ်သူက အစာဖြစ်ပြီး ဘယ်သူက ပင့်ကူဖြစ်နေသလဲ။
          ကျွန်မက တကယ့်အဖြစ်အပျက် ဇာတ်လမ်းတစ်ပုဒ်ကို အခြားသူတွေ ပြောတာကြားရတိုင်း ဟုတ်ပါ့မလား၊ တကယ်လားဆိုတဲ့ စိတ်တွေနဲ့ ဒွိဟဖြစ်နေတုန်း။
          မနေ့က ဘုန်းကြီးကျောင်းကအပြန် ဝါးတောနားကအဖြတ် ရိပ်ခနဲဝင်သွားတဲ့ လက်ထဲမှာလည်း တစ်စုံတစ်ခုကို ကိုင်ထားတဲ့အဘွားကြီးကို မြင်လိုက်ရတယ်။ သေချာတာကတော့ ဝါးတောထဲ ကျော်စွာရောက်နေပြီပေါ့။ ဒါကြောင့် သေချာချောင်းကြည့်တာ မဟုတ်ပေမယ့် ခဏတော့ မြင်ချင်စိတ်နဲ့ ကြည့်မိပါတယ်။ မှောင်ရိပ်ထဲမှာ ကျော်စွာ စီးကရက်သောက်နေတာကို တွေ့ရတယ်။ ကြာလိုက်တာဆိုတဲ့ ညည်းညူသံကို တစ်ချက် ကြားလိုက်ရတယ်။ အဘွားကြီးရောက်လာတော့ ကျော်စွာကို ပိုက်ဆံ ဒါမှမဟုတ် ပစ္စည်းတစ်ခုခု ပေးလိုက်တယ်လို့ ထင်တယ်။ နောက်တော့ ခုခေတ်ချစ်သူ ရည်းစားတွေအတိုင်း…။
          ဒီဇာတ်လမ်းက တဖြည်းဖြည်း အကျယ်အကျယ် ဖြစ်နေတော့ ပေစိကလည်း ဘယ်ကနေ ဘယ်လိုသိလာတယ်မသိ။ နောက်ဆို အဲဒီနားက မဖြတ်တော့ဘူးလို့ ဆုံးဖြတ်လိုက်တယ်။
          တစ်နေ့တော့ မထင်မှတ်ဘဲ အလှူအိမ်တစ်ခုမှာ အဘွားကြီးနဲ့ တည့်တည့်ကြီးကို သွားဆုံတော့တာပဲ။ ဘေးနားက သူ့သမီး မအေးပိုင်တစ်ယောက်လုံး ပါနေတာကို သမက်ပန်းကန်ထဲ ဟင်းတုံးတွေ ခပ်ခပ်ထည့်ပေးနေလိုက်တာများ မြင်လို့တောင် မကောင်းဘူး။ မအေးပိုင်ကတော့ ထုံစံအတိုင်း ခပ်အေးအေးပါပဲ။ အဘွားကြီးကသာ သွက်လက်နေတာ။ ထူးခြားတာတစ်ခုက သူ့သမက်လေးလက်မှာ ရွှေတဝင်းဝင်းဖြစ်နေသလို ဆိုင်ကယ်တစ်စီး ဝယ်ထားတယ်လို့ စကားဝိုင်းမှာ ထွက်လာတယ်။ မအေးပိုင် ယောက်ျားက ဆိုင်ကယ်လိုချင်တာ။ မအေးပိုင်က အလုပ်လည်းလုပ်ဖြစ်အောင် ထော်လာဂျီဝယ်ချင်တာ။ နောက်ဆုံး သမက်တော်လေး ရွှေစိတ်တော် အငြိုငြင်မခံနိုင်လို့ အဘွားကြီးက ဆိုင်ကယ်ဝယ်ပေးလိုက်တယ်ဆိုပဲ။ မအေးပိုင်ကတော့ ရွာနားနီးစပ်တွေမှာ ပစ္စည်းလေး၊ ဘာလေး ပို့ပေးလုပ်ဖို့ သူ့ယောက်ျားကို စည်းရုံးနေတာ။ နောက်ဆုံး အဘွားကြီးရဲ့ အလိုလိုက်မှုတွေက တစ်ဖတ်သတ်ကြီး ဖြစ်လာတော့ တစ်သက်လုံး အေးလာသမျှ ရေခဲတုံး မအေးပိုင် ပေါက်ကွဲတော့တာပဲ။
          တနင်္ဂနွေသမီး မအေးပိုင်က ဘယ်သူမှ မနိုးခင် နံနက်ဝေလီဝေလင်းမှာ ဆိုင်ကယ်ကြီး တွန်းထုတ်ယူသွားပြီး ချောက်ထဲကို တွန်းချပစ်လိုက်တော့တယ်။ ချောက်ကလည်း ခပ်နက်နက်ဆိုတော့ ဘာမှမမြင်ရဘူး။ ခြေရာ၊ လက်ရာမပျက်အောင် လုပ်ထားခဲ့တယ်။ ဆိုင်ကယ်ရကတည်းက ဖင်မီးခိုးထွက်အောင် စီးနေတဲ့ သူ့ယောက်ျားကိုလည်း တော်တော်အမြင်ကတ်နေပုံရတယ်။
          ထုံးစံအတိုင်း နိုးလာတော့ ဆိုင်ကယ်လည်းမတွေ့ရော ပြဿနာရှာတော့တာပေါ့။ မအေးပိုင်ကလည်း မသိဘူးဆိုပြီး မတုန်မလှုပ် ကျောက်ရုပ်။ အဘွားကြီးကလည်း အပူမီး တိုက်ထားရသလိုပေါ့။ သမက်ကို ကြေးကြီးကြီး ဝယ်ပေးထားတဲ့ ဆိုင်ကယ်ပျောက်ပြီဆိုတော့ ရှာကြဖွေကြပေမယ့် မတွေ့ဘူး။ မစဉ်းစားတတ်အောင် ဖြစ်နေတော့ ဆိုင်ကယ်ဝယ်တာကို မကျေနပ်တဲ့ မအေးပိုင်ကို မီးကုန် ယမ်းကုန် စွပ်စွဲတော့တယ်။
          ဒီတင်မှာ မအေးပိုင်ရဲ့ ဒေါသမီးတွေ တောမီးလောင်သလို တဝုန်းဝုန်းလောင်တော့တယ်။ အရှက်နဲ့ သိက္ခာကို ကျမှာစိုးလို့ အောင့်အည်းနေခဲ့သမျှ ငရဲရလည်း ခံရတော့မယ်ဆိုပြီး မအေးပိုင် ကြွေးကြော်လိုက်တယ်။
          ဆိုင်ကယ်ဝယ်ပေးလို့မှ စိတ်တိုတဲ့အခံက အရှိန်ကောင်းနေတုန်း၊ ဝါးတောဇာတ်လမ်းကို မအေးပိုင် ကိုယ်တိုင် တွေ့သွားတယ်လို့ ပေစိက ကျွန်မကို ဖောက်သည်ချတယ်။ မအေးပိုင်က ဝါးတောထဲ အရင်ရောက်နှင့်နေတဲ့သူ။ ပေစိက မအေးပိုင်ကို ဝါးတောအစပ်မှာ မြင်ရတော့ ကုပ်နေရတာပေါ့။ မအေးပိုင်က နဖူးတွေ့၊ ဒူးတွေ့ဆိုတော့ နတ်ပူးသလို တဆတ်ဆတ်တုန်နေတယ်။ လက်တွေဆိုတာကလည်း ဆုပ်ချည်ဖြန့်ချည်တဲ့။ ဘာလုပ်လို့ ဘာကိုင်ရမှန်းမသိဖြစ်နေတဲ့ မအေးပိုင်က တုန်တုန်ယင်ယင်နဲ့ အနားမှာရှိတဲ့ ခပ်ရှည်ရှည်ဝါးတုတ်ကို ကောက်ကိုင်ပြီး အသံကုန်အော်ပြီး၊ သူ့ ယောက်ျားကို ပြေးသွားပြီး ရိုက်တော့တာပဲ။ သူ့အမေကိုရိုက်ရင် ငရဲကြီးမှာစိုးလို့ မရိုက်ဘူး။ ဝါးတောထဲမှာ မှောင်ကလည်းမှောင်လာနဲ့ ရုတ်တရက် အငိုက်မိသွားတော့ မအေးပိုင် ယောက်ျား ကျော်စွာ အရိုက်ခံရပြီး ခေါင်းကွဲသွားတယ်။ သူ့အမေကိုလည်း ဝါးတောထဲကျမှ စိတ်ရှိ၊ လက်ရှိ ကြိမ်းမောင်းတော့တယ်။ ပေစိက ကြည့်နေတာ အသက်တောင် မရှူရဲဘူးတဲ့။
          မအေးပိုင်ကလည်း ဆိုင်ကယ်လည်း သူချောက်ထဲ တွန်းချပစ်တဲ့အကြောင်း၊ ဒီလိုသာဆိုရင် မကြာခင်မှာလည်း အိမ်ကို မီးရှို့ပစ်မယ့်အကြောင်းတွေပြောတယ်။ အဘွားကြီးကို မအေးပိုင်က နောက်ဆုံးတစ်ခွန်းပဲ ပြောတယ်။
          "ရှင်က ကျွန်မကို မွေးထားတဲ့ အမေအရင်းမှ မဟုတ်တာကိုး။ ခုလို လုပ်ရက်မှာပေါ့"
          လို့ ပြောပြီး ထွက်သွားတယ်။ အဘွားကြီးရော၊ ကျော်စွာရော ဘာမှပြန်မပြောနိုင်ဘူးတဲ့။ နောက်နေ့ ခေါင်းမှာ ပတ်တီးကြီးနဲ့ ကျော်စွာက အိမ်အပေါ်ထပ်က လိမ့်ကျလို့လို့ပြောပြီး၊ ဆိုင်ကယ်ကိုတော့ ပြန်ရောင်းလိုက်ပြီလို့ သတင်းလွှင့်တယ်။ တကယ်တော့ မအေးပိုင်ဟာ အဘွားကြီး သမီးရင်း မဟုတ်ဘူးကိုး။  ကျွန်မတို့က နောက်မှ ပြောင်းလာတာဆိုတော့ သူတို့အကြောင်းကို ဘယ်သူကမှ တိတိကျကျမသိ။
          အဘွားကြီးကြည့်ရတာ ဒီနောက်ပိုင်း အရင်လို ထောင်ထောင်ကြွားကြွား သိပ်မတွေ့ရသလိုဘဲ၊ အိမ်တွင်းပုန်းနေတာ များနေတယ်။ မအေးပိုင်က အရင်ကလို ရပ်ထဲ၊ ရွာထဲ သွားလာနေမြဲ ဘာမှ ပြောင်းလဲပုံမပေါ်နဲ့။
          ဒီနောက်ပိုင်း ဝါးတောက ဇာတ်လမ်းကလည်း များများလာလို့၊ အရင်ဝယ်ထားတဲ့သူက သူ့မြေကွက်ကို ပြန်ရောင်းလိုက်တယ်။ ခုဆိုရင် ဝါးတောနေရာကြီးက အရင်လို အုံ့အုံ့ဆိုင်းဆိုင်းကြီး မဟုတ်တော့ဘဲ အဆောက်အအုံဆောက်ဖို့ ပြင်ဆင်နေပြီ။ ပန်းရန်တွေတောင် ဝင်နေပြီ။
          ဒီလိုနဲ့ အရက်လာသောက်တဲ့ ပေစိ ခေါင်းဆောင်တဲ့ ကာလသားများက တစ်ရံရောအခါက ဇာတ်လမ်းကြီး ပြီးဆုံးသွားပြီလားလို့ သုံးသပ်ကြတယ်။
          မျက်မြင်ကိုယ်တွေ့ ဇာတ်လိုက်ကျော် ပေစိကတော့ ဘယ်လောက်အချိန်တွေကြာကြာ၊ ဝါးတောထဲက သူတွေ့ခဲ့တဲ့ တစ်ရံရောအခါက ဇာတ်လမ်းကို ဖောက်သည်ချလို့ကို မပြီးဆုံးနိုင်တော့ဘူး။

*          *         *


ချောအိမာန် (မန္တလေး)
အမှတ် ၃၃၄၊ အောက်တိုဘာလ၊ ၂ဝ၁၂ ခုနှစ်
မဟေသီ ရုပ်စုံမဂ္ဂဇင်း

1 comment:

myotthakoyin said...

A mature and deeply philosophical reflection, on shocking yet not unheard-of (=we heard such things before) immoral tales of this complicated and disorder world ( lawkagyi 's kamout kama stories), that is masterly executed by the usual cem(mdy)-style where sentences are structured to the effect that readers are rapidly introduced to the next twists and turns of the story. She doesn't allow the readers to get bored. The excited readers might wish that they were there near that bamboo grove (war-taw) where 'stuff' happened. (I don't mean me). Far from wishing that (to be near that wartaw) , as I read the story, I wasn't sure whether to laugh or to cry.Or to run into the deep forest and become a lone meditative monk (a-ka-zar-re) to leave this messy world behind and to get rid off all my 'kilaythar'. But , obviously, I am still here and what is stopping me is the fact that there would be no internet connection in that deep forest for me to continue reading cem(mdy) .