Tuesday, July 17, 2012

နှလုံးသားထဲက...ရွာ


ပတ်ဝန်းကျင်မြင်ကွင်းတို့က စိမ်းစိမ်းစိုစို… တိုက်ခတ်လာတဲ့ လေနုအေးက ရင်ဝကိုတည့်တည့်…


ခုလို လတ်ဆတ်အေးမြတဲ့ လေတွေကို အဆုတ်က တောင့်တနေတာ ကြာခဲ့ပြီ…


ကြည့်စမ်းပါဦး…တောင်ပေါ်ဒေသဆိုတာ… နေရာတိုင်း စိမ်းစိုအေးမြလို့… သဘာဝတရားကြီးက အလှအပတွေကို ဘက်လိုက်စွာ လက်ဆောင်ပေးခံထားရတဲ့ မြို့လေးတဲ့… ပန်းရနံ့တို့နဲ့ ထုံမွှမ်းထားတဲ့… စာ၊ ကဗျာ တွေထဲ တင်စားခံရတဲ့ မြို့လေး… ပြီးတော့ ဗိုလ်ချုပ်ချစ်တဲ့ မြို့လေး…


အဲဒီမြို့လေးဟာ ကျွန်မချစ်တဲ့ မြို့လေးတစ်မြို့လည်း ဖြစ်တယ်… မြို့လေးနဲ့ မဝေးကွာလှတဲ့ နေရာဒေသလေးတစ်ခုဟာ ခုချိန်မှာ ကျွန်မကို ဘယ်လိုကြိုဆိုနေမလဲ ဆိုတာ သိချင်ခဲ့တာပေါ့… နှစ်ပေါင်းများစွာ မရောက်ဖြစ်ခဲ့တဲ့ ဒေသလေးမှာ… ဘာတွေပြောင်းလဲကုန်ပြီလဲ.. တစ်ခုမဟုတ် တစ်ခုတော့ ပြောင်းလဲနေလောက်ပြီ…



မြေနီလမ်းတွေဟာ ကားလမ်းပေါက်နေပြီတဲ့… အိုး… အခုမြင်ရတဲ့ မြေနီလမ်းကျယ်ကြီးဟာ အရင်က နွားလှည်း တစ်လှည်းစာပဲ သွားလို့ရခဲ့တဲ့ နေရာလေးတစ်ခု မိုးတွင်းဆိုရင် မြေနီတွေဟာ စီးလွန်းလို့ ဖိနပ်တွေ၊ နွား လှည်းဘီးတွေမှာ အထူကြီးကပ်နေတော့တာပဲ… အရင်က ထော်လာဂျီ၊ ကားတွေ မနည်းသွားရတယ်.. လမ်းမကောင်းလို့…။ ရေသရောက်ကုန်း ရွာလေးကို ကျော်ရင် ရွာအဝင်လေးကို ရောက်ပြီ… အရင်က ဒီအဝင်နေရာမှာ ညောင်ပင်တွေ အများကြီးရှိခဲ့တယ်… ခုတော့ နှစ်ပင်လောက်ပဲ ကျန်တော့တယ်…





မြေနီလမ်းကျယ်ကြီးက ကားကောင်းကောင်းသွားလို့ရနေပြီ… ကျောက်သားတွေခင်းထားတယ်… မာလာစိမ်း ကုန်စည်စုဆောင်းပို့ဆောင်ရေးစခန်းကို ရောက်ပြီ… မေမြို့ မြို့လေးကနေ ဒီရွာလေးကို အဝင် မိနစ်နှစ်ဆယ်လောက်ပဲ မောင်းရတော့တယ်… အရင်လာရတာနဲ့ တခြားစီဖြစ်သွားပြီ… မှိုင်းလုံး၊ ကျက်တက်၊ ပါအယ်၊ အနီးကပ် မောင်နှမလို၊ မိသားစုလို နေထိုင်တဲ့ ရှမ်းရွာလေးတွေပေါ့… ဦးလေးအိမ်ရှေ့လည်း ကားရပ်လိုက်ရော…
ကြားရပါပြီ… ကြိုဆိုနေကြတဲ့ ရှမ်းသံဝဲဝဲအုပ်စုလိုက်…

ကျွန်မတို့အုပ်စုနဲ့ရောလိုက်တော့ သီချင်းဆိုသံ၊ နှုတ်ဆက်သံ၊ ကခုန်သံ၊ မိတ်ဆက်သံ၊ လွမ်းတဲ့အသံ၊
သတိရတဲ့အသံတွေ ဆူညံသွားတော့တယ်…

ဦးလေးအိမ်ရှေ့မှာ လေတဝရှူရင်း ပတ်ဝန်းကျင်ကိုကြည့်မိတော့…

"အိုး… သူငယ်ချင်းရေ… ဟိုဟာ ဘာအခင်းကြီးလဲ..ပြောင်းခင်းထင်တယ်…"




"ဟုတ်တယ်လှလိုက်တာ စိမ်းစိုနေတာပဲ"

"ဟယ် ဟိုမှာ မြို့မှာ ဈေးကြီးပေးဝယ်ရတဲ့ပန်းတိမ်မနိုင် အပင် အခင်းလိုက်ကြီး ခူးချင်စရာ"



"ခူးသွား…ပြန်ရင် ခူးသွားကြဝေ့"

ဦးလေး စိုက်ခင်း တမျှော်တခေါ်ကြည့်ရင်း ပီတိဖြစ်လာတယ်…

"ခိုင်ရွှေဝါပန်းလေးတွေ ဒီမှာ သန်လိုက်တာနော်"



"မြေနဲ့ရာသီဥတုက ကောင်းတာကိုး"

"ဟော ဟိုအုပ်စုတွေက အိတ်တွေချပြီး ပြောင်းခင်းထဲဓါတ်ပုံရိုက်ဖို့ ပြေးကြပြီ မြန်လိုက်တာ"

"အိမ်ထဲဝင်ကြလေ… အခါးရည်နဲ့ မုန့်တွေကော်ဖီတွေ သောက်ဦး နော့်.. ပြီးရင် ထမန်းစားကြ"

"ဟုတ်ကဲ့…"

ပြောပြီး ကျွန်မလည်း မနေနိုင်တာနဲ့ သူတို့တွေနောက်လိုက်လာခဲ့တယ်…

အများကြီးပြောင်းလဲသွားပါလား…လို့ ခံစားမိတယ်။

"ဟေး ပျော်လား ဝေ့"

"ဟေး ပျော်တာပေါ့ ဝေ့"

ဓါတ်ပုံရိုက်နေတဲ့ သူငယ်ချင်းအုပ်စုက အချင်းချင်းစနောက်နေကြတယ်…

နေရာတွေက အကုန်လှနေတဲ့အတွက် ကင်မရာပါတဲ့သူတိုင်းက တဖျတ်ဖျတ်နဲ့…

"ရှေ့မှာ နီနီရဲရဲပန်းပွင့်လေးက ဘာပန်းလေးလဲ"




"နေကြာလေးနဲ့တူတယ်… မေမြို့ပန်းလို့ခေါ်လားမသိဘူး"

"ဟယ်ပန်းလေးထဲမှာ ပျားလေးနားနေတယ် မိအောင်ရိုက်…ရိုက်.."

သူငယ်ချင်းကအနီးကပ် အမိအရချိန်ပြီး ရိုက်လိုက်တယ်



"လှတယ်နော်"

ပြန်ကြည့်ရင်း သဘောကျမိတယ်..

"ဟဲ့ ဟိုမှာ အိမ်လေးနဲ့ ပန်းပင်တွေကိုဒီနေရာကနေ တစ်ချက်လောက် ကလစ်လုပ်လိုက်ပါဦး"









"ဟိုမှာသဘောင်္ပင်၊ ဟိုဘက်က ပိန္နဲပင်… ရိုက်လိုက်"








"ဦးလေးခြံကတော်တော်စုံတာပဲနော်"


"လာဟိုဘက်သွားရအောင်.. ဟိုအုပ်စု ဘာတွေရိုက်နေလဲ မသိဘူး၊ ဦးလေးတို့က ထမင်းစားမျှော်ရော့မယ်"

"ဟေ့နင်တို့ ဘာတွေရိုက်နေလဲ"

"အစုံပဲ…ဒီပြောင်းခင်းကြီးကို အရမ်းသဘောကျတာပဲ… ငါက လူတွေကို သိပ်မရိုက်ချင်ဘူး… ဒီလို ရှုခင်းတွေကိုကိုင်ချင်တာ"




"ပြပါဦး..လက်စွမ်းပြထားတဲ့ ပုံတွေ"

"ဒီမှာကြည့်…ဒါ ပြောင်းဖူးဆံလေးတွေ လှတယ်မလား"



"အေးလှတယ်"

"အဲဒီထက်သာအောင်ငါ ရိုက်ပြမယ်"

"အပိုတွေ"

"မယုံရင်ကြည့်…ဟို ပြောင်းဆံလေးတွေကိုကြည့်၊ ပျားလေးနှစ်ကောင်ရှိတယ်… သူတို့ပါ ပါအောင် ရိုက်မယ်..အသက်ပိုဝင်အောင်လို့.. အထီးနဲ့ အမလေး ဖြစ်မယ်…"

သူငယ်ချင်းက သူ့ကင်မရာကိုသေသေချာချာချိန်ရင်း ခလုတ်နှိပ်လိုက်တယ်။ ပြီးတော့ ကျွန်မတို့ကို ပြတယ်။



"ဟား…….တကယ်လှတဲ့ပုံလေးပဲ… ငါ ကြိုက်တယ်"

"တွေ့တယ်မလား"

"ကဲဓါတ်ပုံရိုက်တာနဲ့ ထမင်းစားချိန်လွန်နေပြီ… သွားကြစို့…"

* * *



ဒီရွာလေးမှာအရင်ကတည်းက ဆူးပုတ်ပင်တွေပေါတယ်။ ပဲသီးပင်တွေပေါတယ်။ ဒိန်ညင်းပေါတယ်။ မက်မန်းတွေပေါတယ်။ပြောင်းတွေ၊ ကြက်သွန်ခင်းတွေ၊ ခရမ်းချဉ်ခင်းတွေ၊ ငှက်ပျောပင်စိမ်းစိမ်းတွေ…. ပိန္နဲပင်တွေရှိတယ်။မိုးရွာရင် မိုးရေတွေလည်း ပေါသေးတယ်။ ဒါကြောင့် မိုးရေတွေကို အလကားမဖြစ်အောင် တန်ဖိုးထားသုံးစွဲကြတယ်။ တံစက်မြိတ်က ကျလာတဲ့ ရေတွေကို ခံသုံးကြတယ်။ ခုလိုလေး လုပ်ထားတော့ အကြမ်းထည်တော့ သုံးစွဲရသေးတာပေါ့။




ထမင်းစားပြီးရွာထဲ တစ်အိမ်ဝင်တစ်အိမ်တက်ဆင်း နှုတ်ဆက်ကြတာပေါ့။ ဦးလေးတစ်ယောက် အိမ်ကနေ အရှေ့ဘက်တောင်တန်းတွေ၊ လှေကားထစ်စိုက်ခင်းတွေဆီ လက်ညှိုးထိုးပြလိုက်တယ်။ ကင်မရာ ကိုင်တွေကလည်း တက်ညီ၊ လက်ညီ။ ကျွန်မက သေသေချာချာလေး ချိန်ပြီး တစ်ပုံရိုက်လိုက်တယ်။




ဟော… ဟို အိမ်လေးကကျွန်မ မွေးဖွားရာ နယ်မြေအစစ်လေး။ ခုတော့ အိမ်လေးပြင်ဆောက်ထားတယ်။ အရင်က ခြေတံရှည်လေးပေါ့။ချစ်စရာကောင်းပြီး ရိုးသားတဲ့ လင်မယားနှစ်ယောက်ပဲ နေတယ်။ သူတို့အိမ်လေးက သူတို့လင်မယားနှစ်ယောက်အတွက်အတော်ပဲ။ ကျွန်မ အမေက ကျွန်မကို သူတို့ အိမ်မှာ မွေးခဲ့တာလေ… ကျွန်မကိုလည်း သူတို့သမီးတစ်ယောက်လိုပါပဲ။
အမှတ်တရ ဓါတ်ပုံတစ်ပုံ…





ကဲ.. ကျွန်မတို့ ခရီးဆက်ခဲ့ကြတယ်။ရွာလေးရဲ့ မြေနီလမ်းတစ်လျှောက် လမ်းအချိုးလေးမှာ မွှေးပျံ့တဲ့ ပန်းရနံ့က ကိုယ်နဲ့ရင်းနှီးသလို…သစ်ကိုင်းလေးပေါ်တင်နေတဲ့ ပန်းတစ်ပွင့်ကို ယူလိုက်တယ်။




ဘေးအနားပန်းရောင်သန်းနေတဲ့တရုတ်စကားပွင့်၊ တောမှာပွင့်တဲ့ဒီအမျိုးက ပိုမွှေးပြီး၊ ပိုလှနေသလိုပဲ။




သူငယ်ချင်းကနှင်းဆီလည်းအလွတ်မပေး၊ ကျွန်မက သန်မာထွားကျိုင်းနေတဲ့ ကိုက်လန်ပင်ပျိုကို ဓါတ်ပုံရိုက်လိုက်တယ်…







ဒီသစ်သားအိမ်ဟောင်းလေးကအရင်အဖွားနေခဲ့တဲ့ အိမ်လေး၊ အရင်က အဖွားလည်း ဒီပြတင်းပေါက်အပေါ်ကနေ လှမ်းကြည့်ရင်း သူ့သမီးတွေအကြောင်းတွေးမလား၊သူ့မြေးတွေ အကြောင်း တွေးမလားလို့ စဉ်းစားမိတယ်…





ဒီအုတ်ရေကန်လေးက2008 ခုနှစ်က ကျွန်မ လှူထားတာဆိုတော့ ကြာလှပြီပေါ့။ အရင်ကတော့ ရိုးရိုး စိမ့်ကန်ကြီးပေါ့။

ဦးလေးအိမ်ဘက်က"ချောင်း" ကိုကြည့်ချင်တာနဲ့ လာခဲ့ကြတယ်။ ကျွန်မသွားတော့ နောက်ကနေ တစ်ဖွဲ့လိုက်ပါလာတယ်။ "ချောင်း" ရောက်တော့ အရင်တောင်ကျ ချောင်းလေးနဲ့မတူတော့ဘူး၊ ပိုက်တွေတပ်ထားပြီ…။ ရေကတော့ ကြည်လင်ပြီး အေးစိမ့်နေတာပဲ။





ချောင်းပေါ်ကတက်လာတော့ လမ်းမှာ တမျှော်တခေါ် ကိုက်လန်ခင်းကြီးကို တွေ့တော့တာပဲ…။ ကိုက်လန်ခင်းအလယ်ထဲရောက်ဖို့တော်တော်သွားရတယ်။ ဘာအကောင်မှလည်း မကြောက်တော့ ဘူး။ တောပန်းညိုညိုတွေကိုလည်း တွေ့ရရဲ့။





အရှေ့ဘက်ဆီကိုလှမ်းကြည့်ရင် အုံ့အုံ့ဆိုင်းဆိုင်း တောအုပ်လေးက အရင်ကအတိုင်း ပဲ။ တောင်တန်းပြာပြာတွေကိုချစ်လို့ နောက်ခံထားပြီး သူနဲ့အတူပေါ့။



ပန်းတိမ်မနိုင်ခင်းထဲလည်းအမှတ်တရ…





အိမ်ထောင့်ကဖရုံနွယ်လေးလည်း အမှတ်တမဲ့မှ အမှတ်တရ.. အညတရပင်လေးဆိုပြီး ချန်ထားလို့ မဖြစ်ဘူး၊ ခုခူး၊ ခု ချက်စားရင် လတ်ဆတ်ပြီး ချိုနေတာပဲ…။





ခိုင်ရွှေဝါပင်ပျိုလေးတွေနဲ့လည်းသံယောဇဉ်ရှိချင်သေးတယ်… ဒါကြောင့် ကိုယ့်ရှေ့မှာ တပွေ့ တပိုက်… ယိမ်းနွဲ့လို့နေတယ်…





ဒီရွာလေးကိုရောက်ရင် ဘယ်သူမဆို သံယောဇဉ်ရှိသွားကြမှာ အသေအချာပါ… ရိုးရာ ကိုယ်တိုင် ရက်လုပ်တဲ့ဝါးပလိုင်းလေးကလည်း ကျစ်လျစ်ပြီး ခိုင်ခန့်လို့… ဝါးနံ့လေး သင်းနေတယ်…





* * *

မိုးတွေက အချက်မပြဘဲ ဒီဒေသမှာ ရွာချတတ်ရဲ့…ထီးတွေကိုယ်စီ၊ မိုးကာတွေကိုယ်စီ ပါခဲ့ပေမယ့် အနည်းအကျဉ်းတော့ အေးမြတဲ့မိုးရေစက်တွေနဲ့ထိတွေ့ရတယ်… ပွင့်အာဆဲပန်းနှင်းဆီပေါ်မှာ မိုးရေ စက်တွေ ချက်ချင်းမိတ်ဖွဲ့နားခိုသွားတယ်။





အချက်အပြုတ်လည်းကောင်း၊ဧည့်ခံလည်းကောင်း၊ ရာသီဥတုလည်းကောင်းတဲ့အတွက် စိတ်ကို မပင်ပန်းစေဘူး။ လေအေးအေးတိုက်ပြီးမိုး တကယ်ရွာလာပြီဆိုရင်တော့ နွေရာသီမှာတောင် ခပ်စိမ့် စိမ့်အေးတယ်။ ဆောင်းရာသီဆိုရင်မေးဖျားရိုက်အောင် အေးလှတယ်တဲ့… သဘာဝလေ က ပြောင်းခင်းတွေကို ဖြတ်သန်းတိုက်ခတ်လာတယ်။ပြောင်းရနံ့လေးတွေတောင် ခပ်သင်းသင်းပါလာလေ ရဲ့…။
ကျွန်မတို့ရဲ့တည်းခိုရိပ်သာလေးကဘုန်းကြီးကျောင်းဝင်းထဲမှာ။ တောင်ပေါ်ဆိုတော့ ခြင်ကိုက်တဲ့ဒဏ်ကို
မခံစားရဘူး။ ညမှာတော့ ကျွန်မတို့ကို စောစောအိပ်ဖို့ အခွင့်အရေးမပေးဘူး…။ ခင်မင်ရာဆွေမျိုးတွေက
ကိုယ်တိုင်ဆို၊ ကိုယ်တိုင်ကတဲ့ သီချင်း၊ အကနဲ့ ညဉ့်နက်ထိ ဖျော်ဖြေသေးတာ။





နှစ်ပေါင်းများစွာရောက်မလာတာကြာပြီဖြစ်တဲ့ ကျွန်မကို သူတို့တွေက ကြာကြာနေစေချင်တယ်… ကျွန်မတို့လည်း နေချင်ပါတယ်…
တစ်ညအိပ်ခရီးလေးတစ်ခုအဖြစ်မရောက်ဖြစ်တာကြာသွားတဲ့ မွေးရပ်မြေလေးကို ပြန်ခွင့်ရတဲ့ တခဏ အားလုံးကို ကျေးဇူးတင်မိပါတယ်။ ကျွန်မ နှလုံးသားထဲက "ကျက်တက်" ရွာလေးကို တသက်မမေ့နိုင်သလို နောက်တစ်နေ့မှာတော့အားလုံးကို နှုတ်ဆက်ရင်း မဝေးလှတဲ့ တစ်ချိန်ချိန် မှာ ပြန်လာခဲ့ဦးမှာပါလို့ ကတိပေးရင်း………





နှုတ်ဆက်ခဲ့ပါတယ်ရှမ်းတောင်တန်းကြီးရေ…. ပြာလွင်နေတဲ့ ကောင်းကင်ကြီးအောက်မှာ… စိုက် ခင်းတွေနဲ့အတူ ဒီရွာလေးထာဝရ လှပနိုင်ပါစေလို့…………..။


ချောအိမာန် (မန္တလေး)
14 July, 2012
10:30 PM

1 comment:

myothakoyin said...

Much appreciative of this photos set that are spcious and very refreshing to view. Must have been a cloudy day yet a certain scene shines through. Totally agreed that one can easily fall in love with ......... the landscape , the colourful flowers, the lush green vegetation, the bamboo basket, the peaceful country homes ,etc........