Wednesday, September 29, 2010

ရိုးတံနဲ့ ပန်းပွင့်





ဒီနေ့ ကျွန်မရဲ့ ဧည့်ခန်းထဲမှာ စိုပြည်လျက်ရှိနေတယ်။ ဧည့်ခန်းရဲ့ စားပွဲပေါ်မှာ စားစရာတွေ အပြည့်ရှိနေသလို ရယ်မောပြောဆိုနေသံမှာ ပြန်စဉ်းစားရင် လွန်ခဲ့သော နှစ်များဆီက အတိုင်းပါပဲ။
ကျွန်မက ဧည့်ခန်းထဲက ဧည့်သည် မမများအတွက် အအေး၊ ကော်ဖီတွေဖျော်နေတယ်၊ကြိုက်ကလည်း
တယောက်တမျိုး…၊ ကျောင်းကတည်းက သူငယ်ချင်းတွေမို့ အတွင်းသိ၊ ကျွန်မတို့ ခုလို ပြန်ဆုံနိုင်ဖို့
တော်တော်ကြိုးစားထားရတာ၊ ကျောင်းပြီးတော့ အလျှိုလျှို အိမ်ထောင်ကျကုန်ကြတယ်၊ အဲဒီကတည်းက လေးယောက်လုံး တခါမှ မဆုံခဲ့၊ ဒီကြားထဲ သူ့အလုပ် ကိုယ့်အလုပ်နဲ့ မအားတာနဲ့ပဲ… ပြောင်းတဲ့လူက ပြောင်းနဲ့ မတွေ့ကြတော့ဘူး၊ အရင်က တယောက်အကြောင်း တယောက် သိကြ ပေမဲ့ ခုချိန်မှာ ပြောင်းလဲမှုတွေများစွာနဲ့ ဝေးနေကြရတယ်၊ ဒီနေ့တော့ ကျွန်မရဲ့ မှတ်မှတ်ရရ မွေးနေ့လည်း ဖြစ်တာမို့ မဖြစ် ဖြစ်အောင် ဆုံဖို့ တစ်လလောက် ကြိုချိန်းခဲ့ရတယ်၊ ကျွန်မတို့ အားလုံး ပျော်ရွှင်နေကြတယ်၊ ဒီအရသာကို လွတ်လပ်စွာ ပြန်ခံစားခွင့်ကို မျှော်လင့်နေခဲ့တာ ကျွန်မတို့ လေးယောက်လုံးပဲ၊ အားလုံး ဝေးကွာနေရာက ခုလို ပြန်ဆုံတော့ ခံစားမှု အသစ်လေး ရသလို ကျွန်မတို့ အားလုံး အိမ်ထောင်သည်တွေနဲ့မတူပဲ အပျိုတွေနဲ့ တူနေတယ်။
ကျွန်မတို့ တွေ့ဆုံမိကြရင် ကိုယ့်မှာ ဖြစ်နေတဲ့ ပြဿနာ၊ မပြေလည်မှု၊ ပြေလည်မှုတွေ အားလုံးပြောဖို့၊
ရင်ဖွင့်ဖို့ဟာလည်း တာစူထားကြတယ်၊ အသီးသီး အိမ်ထောင်ကျ သွားပေမယ့် အဲဒီအိမ်ထောင်ရေးရဲ့
အခြေအနေကို မသိကြသေးတာမို့ တယောက်အကြောင်း တယောက် စိတ်ဝင်စားနေကြတယ်။
ကျွန်မတို့ ဘယ်လောက် စိတ်ကူးယဉ်ကြသလဲ ဆိုရင် ရင်ဖွင့်ဖို့ကို မဲလိပ်နှိုက်ပြီး အမှတ်စဉ် တပ်ကြတယ်၊
အမှတ်စဉ် နံပါတ်(၁)ကို ကျသွားသူက “ယမင်းတင်အောင်” တဲ့ အမင်းရဲ့ မျက်နှာလေးက အရင်အတိုင်း ချောဆဲ။ နှုတ်ခမ်းက ပြုံးစစ ဖြစ်သွားပြီး သူ့ အကျင့်အတိုင်း ဆံပင်ကို တချက်ခါလိုက်ရင်း….
“ ငါ အရင်ကျသွားတော့ သိပ်မကောင်းဘူး၊ ဒါပေမယ့် ငါ အရမ်းပြောချင်နေတယ်၊ အဓိကက
ငါ့ဘ၀မှာ မထင်မှတ်တာတွေ တွေ့လာရတာပဲ၊ နင်တို့ သိတဲ့အတိုင်း အိမ်ထောင်မကျခင်ကတည်းက အိမ်ရဲ့ စီးပွားရေးလည်း ငါပဲ ဦးဆောင်လုပ်ခဲ့ရတာ၊ ပွဲရုံလုပ်ငန်းဆိုတော ရှုပ်တော့ ရှုပ်နေတာပေါ့၊ ငါက ငယ်ငယ်ကတည်းက ဦးဆောင်လာရတော့ အကျင့်ဖြစ်နေပြီ၊ ငါ့စိတ်က မြန်တော့ ငါလုပ်သမျှပြီးလွယ်ပြီး
အောင်မြင်တာများတယ်၊ ဒါကတော့ ငါ ငယ်ငယ်ကတည်းက ပွဲရုံနဲ့ ရင်းနှီးနေလို့ပဲ ထားပါတော့…”

“ ငါ `ကိုမျိုးဆက်`ကို ဖြစ်စေချင်တာက ငါ့စီးပွားရေးလည်း သူ့စီးပွားရေးပဲ ငါ့မိဘပိုင်တယ် ဆိုတဲ့ အသိကသူ့ခေါင်းထဲကို ရောက်နေတယ်၊ အဲဒီလုပ်ငန်းတွေမှာ စိတ်ပါစွာ ၀င်လုပ်စေချင်တယ်၊ သူ့အတွေးက သူက ငါ့လောက် မလုပ်နိုင်တော့ အလိုလို feel ဖြစ်တယ်၊ ငါ့မိဘကလည်း သူ့ကို မနှိမ်ပါဘူး၊ သူလုပ်တဲ့ကား၊ ဆိုင်ကယ် ပွဲစားအလုပ်က ရတလှည့် မရတလှည့် သိတဲ့ အတိုင်းပဲ၊ သူသာ ဦးစီးနိုင်မယ်ဆိုရင် ငါ ကတဖက်က ဆိုင်တခုခု ဖွင့်လို့ ရတယ်၊ စီးပွားရေးကို ဘယ်လိုလုပ်ရမယ် ဆိုတာ ငါ့လောက် သူနားမလည်ဘူး…”
 “ကုန်သည်တွေကလည်း ကြာတော့ ငါ့ပဲ သိတာပေါ့၊ ဟိုနေရာဆိုလည်း ငါ ဒီနေရာဆိုလည်း ငါပဲ၊ ဒီကိစ္စတွေ ငါ လုပ်ရလို့ ပြောတာ မဟုတ်ပါဘူး၊ သူ့ကိုဖြစ်စေချင်တာပေါ့ ကြာတော့ ငါ့မိဘက ဘာမှ
မပြောပေမဲ့ သူ့ဟာသူ ရှောင်ဖယ်လာတယ်၊ နောက်ဆုံး စိတ်အလိုမကျမှုတွေက ငါ့အပေါ် စုပုံလာပြီး မကြာခဏစကားများကြတာပေါ့၊ အရင်က ငါ သူ့ကို အဲဒီိလို စိတ်ဓါတ် ရှိလိမ့်မယ်လို့ လုံးဝ မထင်ခဲ့ဘူး၊ အဲဒါကငါ့ရဲ့ Main ပြဿနာပဲ ”
“ဟုတ်ပြီ အမင်းရဲ့ ပြဿနာကို သိရပြီ၊ ဘယ်လို ဖြေရှင်းရမလဲ ဆိုတာကို နောက်မှ အဖြေထုတ်ကြတာပေါ့၊ ခု ဒုတိယ တယောက်ရဲ့ ရင်ဖွင့်တေးသံသာကို နားဆင်ရအောင်”
ဒုတိယ အလှည့်က “အသော်”…။
အသော်က ဘာပြောရမလဲ စဉ်းစားနေပုံနဲ့ နှုတ်ခမ်းကို ကိုက်လိုက်သေးတယ်၊
“ငါကတော့ မိဘတွေရဲ့ ဆန္ဒကို မလွန်ဆန်နိုင်တဲ့သူ ဆိုတော့ ကိုနိုင်နဲ့ လမ်းခွဲပြီး မိဘတွေ
ပေးစားတဲ့ ကိုဘုန်းကို လက်ထပ်လိုက်ရတာ ဒီအထိ ရှင်တို့ သိပါတယ်၊ ငါဟာ ကိုနိုင့်ကို လမ်းခွဲပြီး
အိမ်ထောင်တခု အပေါ်မှာ အမြဲ သစ္စာရှိခဲ့ပါတယ်၊ ကိုဘုန်းက အရင်က ရည်းစား မရှိခဲ့ဘူး၊ ကိုနိုင့်ကိစ္စနဲ့
ပတ်သတ်ပြီး သူက သ၀န်တိုတယ်၊ ကိုနိုင်နဲ့က စီးပွားရေးအရ တခါတလေ ဆက်ဆံရတာလည်း ရှိတာပေါ့..”
“သူက အမြဲတမ်း သံသယ မျက်လုံးနဲ့ ကြည့်တတ်တယ်၊ တကယ်တော့ မိန်းမအားလုံးဟာ မျက်နှာ
မများချင် ကြတဲ့ လူချည်းပဲ၊ ဒီတယောက်ထဲ ချစ်ပြီး အိမ်ထောင်ဖက် ကိုလည်း ဒီတယောက်ပဲ ဖြစ်ချင်တာပဲ၊ ဒါပေမဲ့ စိတ်ကူးနဲ့ လက်တွေ့ဟာ ထပ်တူကျချင်မှ ကျတတ်တာပဲ၊ သူကတော့ ငါ့တယောက်ကိုပဲ ကြိုက်ပြီး လက်ထပ်နိုင်ခဲ့တာ ဆိုတော့ ကံကောင်းတာပေါ့၊ ငါနဲ့ ကိုနိုင်ကြားက ဆက်ဆံရေးဟာ သန့်ရှင်းတယ်၊ ဒါကို သူ့မှာ သံသယ အပူတွေနဲ့ နေရတာ သူ့အတွက် မငြိမ်းချမ်းဘူး၊ သူ့ ကြည့်လိုက်ရင် မြုံစိစိနဲ့၊ သေသေချာချာ တော့ ငါ့ကို မပြောဘူးဟ၊ ငါတို့ နှစ်ယောက်ကြားမှာ အဲဒီလိုချည်း မဖြစ်ချင်ဘူး၊ ပွင့်ပွင့်လင်းလင်းပေါ့၊ ဒီလို ကိစ္စတွေက ကြာလာရင် သူ့ဘက်က ပေါက်ကွဲလာမှာ စိုးရိမ်တယ်၊ ငါ့ပြဿနာကတော့ ဒါပဲ၊ ဘာမှ မဟုတ်ပဲ.. “
ကိစ္စတွေက ကြာလာရင် သူ့ဘက်က ပေါက်ကွဲလာမှာ စိုးရိမ်တယ်၊ ငါ့ပြဿနာကတော့ ဒါပဲ၊ှ
လင်မယား ခဏခဏ စကားများနေရရင် ကြာရှည်ကျ မကောင်းဘူးလေ၊ တကယ်တော့ လပ်ထပ်ခြင်း ဆိုတာ သူတို့က ပိုင်ဆိုင်ပြီး ငါတို့က ပိုင်ဆိုင်ခံလိုက်ရတဲ့ သားကောင်တွေလိုပဲ၊ အိမ်ထောင်ရေးမှာ
နားလည်မှု နဲ့ အပေးအယူ တည့်မှ ဖြစ်မယ်၊ ရည်းစားတုန်းက နားလည်ခဲ့တဲ့ အချစ်နဲ့ အိမ်ထောင်ရေးမှာ တည်ရှိတဲ့ အချစ်နဲ့ တခြားစီပဲလို့ ထင်တာပဲ…”
“ အသော်ပြောတာ ဟုတ်တယ် ”
ဇင်မင်းခင်က ထောက်ခံတယ်………

“ကဲ..ကဲ…ဒီတခါ ဒေါက်တာဇင်မင်းခင်ရဲ့ အလှည့်ပါ ”
 “အဇင်.. ရှင်ကတော့ ကျောင်းတုန်းက ပြောဖူးတဲ့ အတိုင်း ရှင် လိုချင်တဲ့ အိမ်ထောင်ရေးတခု
တည်ထောင်နိုင် တယ်လို့ အမင်း ထင်တယ်..”
“အမယ်လေး.. ဒေါ်ယမင်းတင်အောင်.. ကိုယ် အခုချိန်မှာ စီးပွားရေးလောကထဲကိုတောင် ပြေးဝင်လိုက်ချင် သေးတယ်၊ ရှင်တို့ကို ကြည့်ရတာ ဘာပဲဖြစ်ဖြစ် ကိုယ့်ထက်တော့ လွပ်လပ်နေတယ်လို့ ထင်တာပဲ၊ ကိုယ့်ဘ၀ အကြောင်းကို ပြောရရင်တော့ "What is the meaning of my life" လို့ မေးရမလို ဖြစ်နေပြီ၊ အများအမြင် မှာတော့ ကိုယ့်ဘ၀ဟာ အားကျစရာကောင်းပါတယ်…၊ ယောကျာ်းက ဆရာဝန်၊ ယောက္ခမ နှစ်ယောက်လုံးက ဆရာဝန်၊ ကိုယ်က ဆရာဝန်၊ ဒီကြားထဲ ကိုယ့်အဖေက ဆရာဝန်၊ တအိမ်လုံး မိသားစုဝင်တွေ ဆရာဝန် ဖြစ်နေတဲ့အခါ တခြား အကြောင်းအရာ ပြောဖို့ အခွင့်အရေး နည်းပါးလာကြတယ်..”
“ကိုယ်တော့ နေ့တိုင်း liver တွေ၊ lung တွေ၊ Arteries တွေ မြင်နေရတာက တမျိုး၊ အိမ်ရောက်ရင်လည်း ကြားရတဲ့ စကားက ဒီထဲက မထွက်ဘူး၊ တပတ် တခါလောက် လူစုံတဲ့ ထမင်းစားပွဲမှာလည်း ဒီအကြောင်း တွေပဲဖြစ်နေတယ်၊ တခါတလေ တူညီတာတွေ များလွန်းတော့ မတူညီတာလေးတွေကို တောင့်တမိတယ်၊ တခါတလေ ထမင်းချက် အဒေါ်ကြီးပြောတဲ့ဈေးထဲက အကြောင်း၊ လမ်းမှာရန်ဖြစ်ကြတဲ့ အကြောင်း၊ သူတို့ ရွာက အကြောင်းတွေကို ကိုယ့်မှာ မက်မောစွာ နားထောင်နေမိတယ်..”
“ဒီဆရာဝန် ဘ၀ကို အမှန်အတိုင်းပြောရရင် ကိုယ်ကိုယ်တိုင် ရွေးချယ်ခဲ့တာ မဟုတ်ဘူးလေ၊ မိဘတွေ
ရွေးချယ်ခဲ့တာ ဆိုတော့..၊ ကိုယ် ၀ါသနာပါရာမှာ နှစ်မြှပ်နေခွင့်ရတာဆိုရင်တော့ ငါဒီလောက်တော့ ခံစားရမှာ မဟုတ်ဘူး၊ တခါတလေ Uterus ရောဂါတွေ ကြည့်ပြီး ကိုယ်က Maiden ဘ၀ကို နှမြောနေမိတယ်၊ ကိုယ် ပြောတာတွေဟာ ခုချိန်မှာ ရယ်စရာကောင်းနေလိမ့်မယ်၊ ကိုယ့်မှာ body တွေကို မြင်တွေ့နေရတော့ တကယ်တော့ လူဟာ ဘာမှ မဟုတ်ပါလား ဆိုတဲ့ အသိတရားရနေပြီ၊ အလုပ်ပြန်ချိန်တွေကလည်း သူနဲ့ ကိုယ်နဲ့ ဘယ်တော့မှ မတူဘူး၊ သူက မနက်ဆေးခန်းဝင်ရတော့ ကိုယ် မနိုးခင်သွားနှင့်ပြီ၊ ညကလည်း သူက စောရင်စောတယ်၊ ကိုယ်ကလည်း နောက်ကျတတ်တယ်၊ လင်မယားနှစ်ယောက် အတူတူ ထမင်း မစားဖြစ်တာ ကြာပြီ ၊ အေးအေးဆေးဆေးလည်း စကားမပြောဖြစ်ဘူး၊ အဓိက ကတော့ ကိုယ်တို့ဟာ  Life တခုထဲမှာ နစ်မြုပ်နေတယ်လို့ထင်တယ်၊ အဲဒီအတွက် ငြီးငွေ့မှု တအားဖြစ်တယ်၊ သူလည်း အရမ်းပင်ပန်းတယ်၊ `ကိုနေပိုင်`ကို  မိဘသဘောတူတယ် ဆိုပေမဲ့ ငါတို့လည်း မေတ္တာရှိတော့ တခြား  

ပြဿနာတော့ မရှိပါဘူး ”
အချိန်ပေးနှိုင်မှုနဲ့လည်း ဆိုင်မယ်လို့ ထင်တယ်၊ မဟုတ်ရင်တော့ ကိုယ်တို့ သွေးတွေက ကြာလေ
အေးလေ၊စိမ်းလေ ဖြစ်သွားလိမ့်မယ်… ဟား ဟား…”
အဇင်က စကားပြောရင်း သဘောကျစွာ ရယ်ပါသည်။
“အဇင် လိုအပ်နေတဲ့ အချိန်တွေကို အတိုးနဲ့ ချေးမယ်”

အသော်က ရယ်ပြုံးပြုံးနဲ့ဝင်ပြောတယ်“အဇင် life ကလည်း တမျိုးတော့ စိတ်ဝင်စားစရာ ကောင်းတယ်၊ ခရီးတခုခုကို ရက်ရှည် ထွက်ရင်လည်းတနည်းအားဖြင့် လန်းဆန်းမှုတော့ ဖြစ်သွားမယ် ထင်တယ်”
“အမယ် ပြောတာကို ကိုယ် စဉ်းစားဖူးတယ်၊ ကလေး မရခင် အပန်းဖြေတော့ ထွက်ဦးမယ်လို့၊ ကဲ…
အမယ့် အလှည့်၊ ပြော… စာရေးဆရာမ ဆိုတော့ ဇတ်လမ်းအတုတွေတော့ မပြောနဲ့နော်..”
 “စိတ်ချ၊ ကျွန်မကလည်း ရှင်တို့ကို ပြောချင်နေတာ ကြာလှပြီ၊ ကိုနေနဲ့ ကျွန်မက အနုပညာသမားချင်း
အိမ်ထောင်ကျကြတာပါပဲ၊ သူက ကွန်ပျူတာ ဒီဇိုင်နာ ဆိုတော့ အမြဲတမ်း ကွန်ပြူတာနဲ့  နပန်းလုံးနေတာပဲ၊ ခုဆိုရင် ကွန်ပျူတာ၊ အင်တာနက်၊ ပုဂံနက်နဲ့ စုံနေတာပဲ၊ တခါတလေ သူ့ကိုကြည့်ရတာ Robot(ရိုဘော့) စက်ရုပ်တရုပ်လိုပဲ၊ လူကနေ စက်ရုပ်ဖြစ်နေတဲ့ လူသားပဲ၊ ခုခေတ်ကြီးက အရမ်းတိုးတက်တော့ သူ့ဦးနှောက် တွေက အရမ်းအလုပ်လုပ်နေတယ်၊ တခါတလေ သူ ပြောတဲ့ အကြောင်းအရာတွေကို စိတ်မ၀င်စားသလို၊ ကျွန်မပြောတဲ့ အကြောင်းအရာကိုလည်း သူက စိတ်ဝင်စားတာ မဟုတ်ဘူး…”
“တခါတလေ ကျွန်မ ရင်ဖွင့်လိုတဲ့ အကြောင်းအရာတွေကို စိတ်ရှည်စွာ နားထောင်ပေးမယ့် သူ လိုသလို၊ အပြုံးနဲ့ နှစ်သိမ့်ပေးမယ့် သူလည်း လိုအပ်တယ်၊ လိုအပ်ချက်တွေကို အလိုက်တသိ
ဖြည့်ဆည်းပေးနိုင်မယ့် သူလည်း လိုတာပေါ့၊ အဲဒီလို အရာတွေကို အဆင်သင့်ရှိတတ်တဲ့ မိခင်က မရှိတော့ သူ့ကို မိခင်နေရာမှာ အစားထိုးကြည့်ပေမယ့် မရခဲ့ဘူး၊ ပုံသဏ္ဍာန် တူညီပြီး အထဲက အရသာ မတူညီတဲ့ ဘီစကစ်တခုကို စားရသလိုပဲ”
“ကျွန်မ စာတွေကိုပဲ ဖိရေးနေတဲ့ အချိန်တွေမှာ သူ့ကို မေ့သွားတတ်တယ်၊ သူ့မှ မဟုတ်ပါဘူး၊
အရာရာကို မေ့သွားတယ်၊ သူကလည်း ကွန်ပျူတာခုံပေါ် ရောက်ရင် အရာအားလုံး မေ့သွားတယ်၊ ကျွန်မတို့ နှစ်ယောက်ရဲ့ ဆက်ဆံရေးက ကြာလေ အေးစက်လေပဲ၊ သူ ကိုယ့်အပေါ် အစာမကျေတာ တခုရှိတယ်၊ ယောကျာ်းက ဒီဇိုင်နာ ဖြစ်လျက်နဲ့ ကျွန်မ ၀တ္တု မျက်နှာဖုံး(cover)တွေကို
သူ့ကို ဘယ်တော့မှ ဆွဲမခိုင်းဘူး၊ ကျွန်မ သဘောက ကျွန်မ လုပ်တဲ့ အလုပ်တခုကို နှစ်ယောက်ပေါင်းပြီး လုပ်တယ်လို့ မမြင်စေချင်လို့ပဲ၊ အဲဒါကို သူက တမျိုး မြင်တယ်၊
ကျွန်မ ကိစ္စတွေကို သူ ၀င်မပါသလို သူ့ ကိစ္စတွေထဲလည်း ကျွန်မ ၀င်မပါဘူး..”
 “ နောက်ပြီး ကျွန်မရဲ့ ရိုဘော့ စက်ရုပ်က စကားအရမ်းနည်းပြီး အေးတော့ သူ့ရင်ထဲမှာ
ဘာဖြစ်နေမှန်း တော်ရုံနဲ့ မသိရဘူး၊ တနေ့တုန်းကတော့ ကွန်ပျူတာကို အမှတ်တမဲ့ ဖွင့်ကြည့်ရင်း သူ့ခံစားချက်တွေ ရေးထားတာ တွေ့ရတယ်၊ ကျွန်မလည်း တော်တော် အံ့သြသွားတယ်၊ အဲဒီနေ့က စကားများထားတဲ့ နေ့ပေါ့..”
“ကျွန်တော့် မိန်းမ စာရေးဆရာမ `မယ်ဘုန်းခင်` ဟာ ကျွန်တော့်ကို အရမ်းအထင်သေးပါတယ်၊
ကျွန်တော့်ကို  ဥပက္ခောပြုထားပါတယ်၊ ကျွန်တော့် ခံစားချက်တွေ ပြည့်နှက်လာတိုင်း ကွန်ပျူတာနဲ့ပဲ အဖော်လုပ်ခဲ့ရပါတယ်..၊ သူ ကျွန်တော့် အပေါ် ကောင်းပါတယ်၊ ဒါပေမဲ့ မေ့ထားတဲ့ အချိန်တွေ များတယ်၊ ကျွန်တော်မပြောရက်ပါ၊ သူ စာရေးပျက်မှာ စိုးရိမ်ပါတယ်တဲ့..”

“ အလို… ရှင့်ရဲ့ စက်ရုပ်ကြီးက အလာကြီးပါလား၊ ရယ်ရတယ်”

“ အမယ်..အမှန်တော့ ရှင့်လစ်ဟင်းမှုတွေ များပြီလို့ ထင်တယ်..”
“အမင်းရယ်.. စာရေးတယ်ဆိုတဲ့ အလုပ်က ဇျဉ်ဝင်တဲ့ အချိန်မှ ရတာဆိုတော့..”
“ဒါတော့ ဒါပေါ့ဟာ၊ သူ့ ခံစားချက်လေးက ငါတောင် သနားလာပြီ..”
အသော်က အဇင့်ကို ထုရင်းပြောတယ်။
“ ငါတို့ အားလုံးရဲ့ တယောက်ချင်း ပြဿနာက ဘာမှ သိပ်မကြီးကျယ်ဘူးလို့ ထင်တယ်၊
ဘယ်လိုဆိုရင် ပိုပြီး အဆင်ပြေနိုင်မလဲ၊ စာရေးဆရာမ အမယ့်ကိုပဲ အကြံတောင်းရမှာပဲ ..”
အသော်က ခေါင်းတညိတ်ညိတ်နဲ့ ပြောတယ်။
အမယ်က မေးစေ့လေးကိုင်ရင်း တွေးတွေးစစနဲ့ပြောတယ်
“ ရှင်တို့ကို တခုပြောမယ်၊ ရိုးတံနဲ့ ပန်းပွင့်ကို ဘယ်လိုမြင်သလဲ၊ အဲဒီ ရိုးတံနဲ့
ပန်းပွင့်ရဲ့ ကြားထဲက ဆက်သွယ်မှုကို ဘယ်သူမှ မမြင်နိုင်ကြဘူး၊ ပန်းပွင့်ဟာ ခိုင်မာတဲ့ ရိုးတံ မရှိရင် မဖြစ်သလို၊ ပန်းပွင့် မရှိရင်လည်း ရိုးတံဘ၀ဟာ အဓိပ္ပာယ် ရှိလာနိုင်မှာ မဟုတ်ဘူး၊ မမြင်နိုင်တဲ့ ဆက်သွယ်မှုနဲ့ ရိုးတံနဲ့ ပန်းပွင့်ကို ချည်နှောင် ထားတယ်၊ တခုနဲ့ တခု ဒွန်တွဲနေတယ်၊ ကျွန်မတို့ရဲ့ ဘ၀ကလည်း အဲဒီသဘောတရားနဲ့ တူတယ်၊ ရိုးတံကို ပစ်ပယ်လို့လည်း မရဘူး”
 “ပန်းပွင့်တွေမှာတောင် သူတို့နဲ့ လိုက်ဖက်ညီတဲ့ ရိုးတံတွေ ဖွဲ့စည်းပေးထားတယ်၊ ကျွန်မတို့လည်း ဘ၀မှာ လိုချင်တဲ့ အရာကို ရွေးချယ်ပြီး ပြတ်သားတဲ့ ဆုံးဖြတ်ချက်တွေ ချမှတ်ခဲ့ကြတယ်၊ ဘယ်သူကမှ
အဲဒီဆုံးဖြတ် ချက်ကို မမှားချင်ကြဘူး၊ အိမ်ထောင်ကွဲ ဘ၀ ကို ဘယ်သူမှ မရောက်ချင်ကြဘူး၊ ဘာကိုမှလည်း အဆုံးရှုံး မခံချင်ကြဘူး၊ အဲဒီ မဆုံးရှုံးချင်တဲ့ အရာကို ကာကွယ်ဖို့ နည်းတနည်းတော့ လိုအပ်တယ်၊ အဲဒါကတော့ ကိုယ်စီရဲ့ ရင်ထဲမှာ ကိန်းအောင်းနေတဲ့ အရာတွေကို ပွင့်လင်းစွာ တိုင်ပင်ဆွေးနွေးဖို့ပဲ..”
“အမယ်.. ပြောတာ လက်ခံတယ်၊ အသော်ကတော့ သူ့ကို အိမ်ထောင်ရေးမှာ သစ္စာမြဲမယ့်၊ လူ့ကျင့်ဝတ်နဲ့  ညီတဲ့ သူ ဖြစ်စေချင်တယ်..”
“အဇင်ကတော့ တခါတလေ တရေးနိုးရင် အားလုံးကို စွန့်ပြီး တရားအားထုတ်ချင်မိတယ်၊ တကယ်တမ်း ကျတော့ ပါရမီဆိုတာ မပါသေးတော့ လူ့လောက စစ်ပွဲထဲမှာ နေနေရဦးမှာပဲ”
“ဒီလူ့လောက စစ်ပွဲထဲမှာ နေသရွေ့ ကိုယ်ရွေးချယ်တဲ့ ဘ၀မှာ နေပျော်စရာ ဘ၀တခု ဖြစ်အောင်၊ ကျေနပ် နိုင်အောင် နေရမှာပဲ၊ သိပ်မကြီးထွားသေးတဲ့ ပြဿနာကို ပြေလည်အောင် ဖြေရှင်းရမှာပဲ၊ ကျွန်မတို့ ပန်းပွင့်တွေ လှပဖို့ ရိုးတံဟာ ခိုင်ခံ့ဖို့ လိုအပ်တယ် ..”
“ အမင်းကတော့ သူ မလုပ်ချင်တာ ဇွတ်မလုပ်ခိုင်းပါဘူး၊ ပြေလည်အောင် ညှိယူဖို့
စဉ်းစားထားတယ်..”
“ကျွန်မတော့ ၀တ္တုအတွက် plot တခုရပြီ ”
ထိုနေ့က ကျွန်မတို့ အားလုံး စကားဝိုင်းလေး ရုပ်သိမ်းပြီး ချိန်မှာ ထူးခြားစွား ပို၍
လွတ်လပ်ပေါ့ပါးနေပါသည်။ ညရောက်တော့ စာရေးစားပွဲမှာ မထိုင်ဖြစ်တော့ဘဲ ကွန်ပျူတာ အခန်းထဲက ရိုဘော့စက်ရုပ်နား သွားရင်း ကော်ဖီတခွက် ချပေးတော့ သူ အံ့သြသွားတယ်။ သူ့ ဘေးနား ထိုင်ရင်း သူ့ရဲ့ ဒီဇိုင်းတွေကို ကျွန်မ ဝေဖန် ပေးတယ်။ သူက ကျွန်မကို အခြားလုပ်ထားတဲ့ ဒီဇိုင်းတွေထုတ်ပြတယ်၊ သူ့ရဲ့ လှုပ်ရှားမှုနဲ့ စကားသံတွေက ပိုသွက်လက်လာတယ်။
“ကျွန်မ နောက်ထွက်မယ့် ၀တ္တု မျက်နှာဖုံးပုံကို ဆွဲပေးရမယ်နော် ” လို့ ပြောတော့ သူက
အံ့သြစွာ ခေါင်းစောင်း ကြည့်ပြီး ရယ်မောရင်း….
“ခုတော့.. ကိုယ့်မိန်းမ.. ကိုယ့်ကို အသုံးလိုအပ်လာပြီပေါ့…၊ အလှဆုံးဖြစ်အောင်
လုပ်ပေးရမှာပေါ့၊ ခေါင်းစဉ်ကဘာတဲ့လဲ..”
“ ရိုးတံနဲ့ ပန်းပွင့် ”
သူ့နှုတ်ခမ်းက “ ရိုးတံနဲ့ ပန်းပွင့် ” လို့ လိုက်ရေရွတ်လိုက်တယ်။
ကျွန်မကလည်း “ ရိုးတံနဲ့ ပန်းပွင့် ” လို့ ပြောရင်း ခပ်နွေးနွေး ရယ်မောလိုက်ပါတော့တယ်… ။

ချောအိမာန်(မန္တလေး)
            ကလျာမဂ္ဂဇင်း
           ၂၀၀၄၊ စက်တင်ဘာလ၊


2005 အိပ်မက်စစ်နှင့် အခြား ဝတ္ထုတိုများ
စိတ်ကူးချိုချို စာအုပ်တိုက်
2009 ဝတ္ထုတိုများ

Sunday, September 19, 2010

အောက်ဆီဂျင်မရှိတော့တဲ့ နှလုံးသား


ဒုံး…. ဒုံး… ဒုံး…
``ဟာ အခန်းထဲမှာ ဘာတွေဖြစ်ကုန်ပြီလဲ … သွားကြည့်လိုက်ပါအုံး..``
အခန်းထဲမှာ ကျော်မင်းလွင် ထင်တိုင်း သောင်းကျန်းနေပြီနေမှာ… သူက ဒီလိုဘဲ စိတ်ကြီးပြီး မထင်ရင် မထင်သလို လုပ်တက်တယ်.. တစ်ဆောင်တည်း တစ်ခန်းထဲ အတူတူ နေရတာဆိုတော့ သည်းခံရတာပါဘဲ.. ခုလဲ အပြင်မှာ ရေချိုးပြီး ရှိသေးတယ် အထဲမှာ တဒုံးဒုံးနဲ့ ဘာတွေဖြစ်နေလဲ မသိဘူး  မင်းသွင်က ရေချိုးလက်စနဲ့ လှမ်းအော်ပြီး ပြောတယ်.. သူ့ပစ္စည်းတွေ တစ်ခုခုဖြစ်မှာစိုးလို့ နေမှာ……. တခါတုန်းက မင်းသွင် ဂစ်တာကြီး ထုလိုက်တာ ကွဲရော..  ကျွန်တော် အခန်းတံခါးဖွင့်လိုက်တော့….
``ဟာ`` .. ဟေ့ကောင် ကျော်မင်းလွင် ဘာဖြစ်တာလဲ``
ကျော်မင်းလွင် လက်မှာ သွေးသံရဲရဲနဲ့ ဒါဏ်ရာကြောင့် လန့်သွားတယ်…  ကျော်မင်းလွင် က နံရံကို ဆက်ထိုးဖို့ ဟန်ပြင်လိုက်စဉ်မှာ လက်ကို နောက်ကဖမ်းဆွဲလိုက်တယ်..
``မင်း ဘာဖြစ်နေတာလဲ .. လက်မှာလဲ ဒဏ်ရာရနေပြီ.. ဘယ်သူနဲ့ ရန်ဖြစ်လာလို့လဲ`` ကျော်မင်းလွင် က ခေါင်းရမ်းပြီး နံရံကို ကျန်တဲ့ လက်တဖက်နဲ့ ထပ်ထိုးတယ်…
``ဟာ… မင်းကတော့ကွာ.. စိတ်ငြိမ်ငြိမ်ထားစမ်းပါ ဘာဖြစ်လာတာလဲ ပြော.. လာ .. ကုတင်ပေါ်ထိုင်… မင်းလက် ဆေးထည့်ပေးမယ်``
``ကျော်မင်းလွင်.. ဟာ ဘာဖြစ်တာလဲ`` မင်းသွင်ကရေချိုးပြီး ဝင်လာရင်းမေးတယ်..
``ဒီမှာ ကွာ.. မေးပါအုံး နံရံလက်သီးနဲ့ ထိုးထားတာ.. ဘဖြစ်မှန်းလဲ မသိဘူး``
``ဘာဖြစ်လို့လဲ.. မင်းအိမ်နဲ့ အဆင်မပြေခဲ့ပြန်ဘူးလား``
``မဟုတ်ဘူး… မဟုတ်ဘူးကွာ.. ငါ့ကို ဘာမှ မမေးကြပါနဲ့…``
``မင်းကလဲကွာ သူငယ်ချင်းအချင်းချင်းဘဲ ဘာအဆင်မပြေတာရှိလဲ ပြောရမှာပေါ့ ငါတို့တုန်းကလဲ မင်းကူညီခဲ့တာတွေရှိတာဘဲ``
``အခုဟာက အကူညီယူရမဲ့ ကိစ္စမဟုတ်ဘူးကွ.. တော်ပြီကွာ ငါမပြောပါရစေနဲ့… မင်းတို့လဲ ငါ့ကို ကြည့်မနေပါနဲ့..``
ဆေးထည့်ပေးတော့ စိတ်နဲ့လူ မကပ်သလို ငြိမ်နေပြီ… ကျော်မင်းလွင် မျက်လုံးတွေက တစ်နေရာတည်းစိုက်ကြည့်ပြီး ထွေထွေငေးငေး ဖြစ်နေတယ်.. သူ့မျက်လုံးတွေက ထူးဆန်းစွာ ဒေါသရိပ်မသန်းဘဲ တစ်မျိုး ဘာကြောင့် ဖြစ်နေတာလဲ .. ခါတိုင်း.. သူ့ သူငယ်ချင်းတွေနဲ့ ရန်ဖြစ်လာတာနဲ့ မတူ…….
မိဘတွေနဲ့ အတူမနေဘဲ စိတ်ထင်ရာ လွတ်လပ်ခွင့်ကို အသုံးချဖို့ အဆောင်လာနေတာမို့.. စရိုက်က ခပ်ဆိုးဆိုးပင်.. တစ်ချို့နေရာတွေမှာ စိတ်ကောင်းရှိပေမဲ့… တချို့ နေရာကျ ဂျစ်ကန်ကန် ငွေကိုတော့ တခါတခါ အိပ်ပြန်တောင်းပြီး နောက်ဆုံးနှစ်ကျောင်သား ဘဝကို ပျော်ပျော်နေနေသူ.. အိမ်နဲ့ကလဲ အဆင်ပြေလှတာမဟုတ်…
``ငါခရီးထွက်မယ်ကွာ``
``ဟ.. ဘယ်ဖြစ်မှာတုန်း.. စာမေးပွဲရှိသေးတယ်..``
``စာမေးပွဲ ပြီးမှ ငါတို့ အတူတူသွားမယ် လို့ ပြောထားတယ်လေ… မင်းခံစားနေရတာမဟုတ်သေးဘူး.. ဘာလဲ မင်း ကောင်မလေးနဲ့ အဆင်မပြေဘူးလား``
``မဟုတ်ပါဘူးကွာ.. ငါ အရမ်းစိတ်ညစ်တယ်``
``ငါတို့ ဘာလုပ်ပေးရမလဲ.. မင်းခုလို စိတ်ညစ်တဲ့ ပုံစံ တခါမှ မမြင်ဖူးဘူး..``
မင်းခုလိုဖြစ်နေတော့ ဘာမှန်းမမသိဘဲ .. မပျော်တော့ဘူး``
``ထားလိုက်ပါတော့ကွာ… ``
လောကမှာ ကျွန်တော့် လောက်မိုက်မဲတဲ့ ကောင်ရှိပါအုံး မလား…
ကျွန်တော့် အပြစ်ဒါဏ်ကြောင့် အခု မျက်ရည်ကျနေရပြီ.. ဘဝနဲ့ ချီပြီးပြောရရင် ဆယ်တန်းတုန်းက တစ်ခါဘဲ စာမေးပွဲကျလို့ မရိုက်ဖူးတဲ့ ဖေဖေက လက်သီးနဲ့ ထိုးလို့ မျက်ရည်တစ်ခါဘဲ ကျဘူးတယ်.. ငယ်ငယ်ကလဲ ဘယ်လောက်ရိုက်ရိုက် ပေခံပြီး မငိုခဲ့ဘူး.. ခုတော့ ရင်ထဲက တဆစ်ဆစ်နာကျင်မှုက အလိုလို မျက်ရည်တွေ ဝိုင်းလာစေတယ်.. ကိုယ့်ကိုယ်ကို ခွင့်လွှတ်နိုင်အောင် ဒေါသဖြစ်မိရင်း… ဘယ်လိုလုပ်ရမလဲဆိုတာ မသိနိုင်တော့… ငါဘယ်သူ့ကို ဖွင့်ပြောရမှာလဲ.. ငါဖွင့်ပြောရလောက်အောင် သတ္တိမရှိဘူး.. ငါ့ကိုယ်ငါတောင် ခွင့်မလွှတ်နိုင်တဲ့ကိစ္စ .. ခွင့်မလွှတ်ကြပါနဲ့ကွာ…
`` သုတ `` မင်း မျက်နှာကို ငါမကြည့် ပါရစေနဲ့….
ငါ့အတွေးတွေနဲ့ နေပါရစေ… အရာအားလုံးဟာ .. ကြီးမားတဲ့ ရိုက်ခက်သံတစ်ခုလို လောက မြေပြင်တစ်ခုလုံး တုန်လှုပ်သွားသလို ခံစား သွားရစေတယ်….
(၂)
``ဟေ့ကောင်.. ဒီနေ့ ဘယ်လိုလဲကွ .. အခြေအနေ တိုးတက်ရဲ့လား``
သုတ  က ခေါင်းခါတယ်
``မင်းကွာ .. အသုံးမကျလိုက်တာ.. ကိုယ့်ကောင်မလေးတောင် ကိုယ်မပီဘူး``
``ဟာ.. မင်းတို့ ပြောသလို မဖြစ်နိုင်ပါဘူး .. ငါ့ကိုစိတ်ဆိုးသွားရင် ဘယ်လိုလုပ်မလဲ``
``အဲဒါကြောင့် မင်းကို မိန်းကလေးတွေရဲ့ အထာမနပ်ဘူးလို့ ပြောတာပေါ့``
``မင်းကောင်မလေးကို အပိုင်းသိမ်းပိုက်ထားလိုက် .. စိတ်ဆိုးစရာမရှိဘူး.. ဒါမှ သူလဲ နောက်တစ်ယောက် မပြောင်းမှာ``
``သူက ငါ့ကို ချစ်ပါတယ် မပြောင်းပါဘူး``
``မင်းက အစိမ်းသက်သက်ကို ဒီတစ်ယောက်ထားပြီး .. ဒီတစ်ယောက်ို အရူးအမူးဖြစ်နေတာ.. မင်း ငါ့ကို မမြင်ဘူးလား .. နှစ်ယောက် တပြိုင်ထည်းထားတာတောင် ဘယ်သူက စိတ်ဆိုးလဲ .. သူတို့ကို အပီသိမ်းသွင်းထားလိုက်တာ ဟား.. ဟား..``
ကျော်မင်းလွင် က ရယ်ရင်း  သုတ ကို ခေါင်းအုံးနဲ့ လှမ်းပြစ်တယ်…
``မင်းအခြောက်ပုံစံ လုပ်မနေနဲ့ .. ကြာရင် ခြောက်သွား အုံးမယ်.. မင်းသွင်ကို ကြည့် ငါ့ရဲ့ လက်ချာတွေကို အပြည့်အဝ အသုံးချလိုက်တာ.. သူ့ကောင်မလေးဆို ခွာတောင် မခွာနိုင်တော့ဘူး``
``ဟုတ်တယ် သုတ  တခါတလေကျ မိန်းကလေးတွေက တစ်မျိုးဘဲ .. သူတို့ ရက်ရောစွာပေးတဲ့ သစ်သီးကိုစားရတာ သိပ်အရသာမရှိဘူး.. စေတနာမရှိတရှိလေးပေးမှ စားသုံးရတာ ပိုအရသာတွေ့တာကွ.. ပြီးတော့ ပိုပြီး ရင်းနှိးသွားသလို စိတ်ချင်းလည်း ပိုနားလည်သွားတယ်``
``ငါတို့က ရည်းစားဖြစ်တာ မကြာသေးတော့.. ``
``မင်းကလဲ သတ္တိမရှိလိုက်တာ လွန်နေတာဘဲ``
``မဟုတ်ပါဘူး.. ငါက ငါ့ကောင်မလေးကို ဘာမှ မလုပ်ရက်ဘူး.. နမ်းချင်ရင်တောင် တခါတလေလေးမှ…``
``ဟား… ဟား.. ဟား.. မင်းကွာ ရယ်ရတယ်.. ခြောက်တယ်ပြောတော့လဲ မခံနိုင်ဘူး .. အဲဒီလို သွားလုပ်နေရင် ဟိုက နောက်တစ်ယောက်နောက် ပါသွားလိမ့်မယ်.. ဒီခေတ်ကြီးထဲမှာ မင်းလို အရိုးစွဲနေတဲ့သူ ရှာမှရှားဘဲ… ခေတ်နဲ့ အမှီလိုက်နိုင်ဖို့ ငါ့ဆီမှာ ပညာယူလိုက်အုံး … မင်း အစမို့လို့ပါကွာ…
နောက်တစ်ပါတ်ကျ မင်းကောင်မလေး နဲ့ တွေ့မှာ ဟုတ်လား…
ငါ လက်ချာပေးမယ်``
``တော်ပါပြီ ကွာ``
``ခက်နေပါပြီ.. ဉာဏ်ပူဇော်ခ တပြားမှ မယူဘူး ဒီလိုဆရာမျိုး ရှာကြည့်အုံး အခြောက်ကလေးရဲ့``
သုတ က သူ့ကို အခြောက်လို့ ခေါ်ခံရတာကြောင့် မျက်နှာပျက်ပြီး မခံချင်စိတ်နဲ့…
``ငါ့ကို အခြောက်လို့ မခေါ်ပါနဲ့ .. ငါယောက်ျားပါကွ.. မင်းတို့ဆီမှာ ဒီတညတော့ တပည့်ခံလိုက်မယ်``
``ဟား… ဟား.. ဟား…. ဒီလိုမှပေါ့ကွ .. ကျော်မင်းလွင်ရဲ့ ဒုတိယ တပည့်ကျော်ပေါ့…
သုတ က ကျွန်တော့်တို့ထဲမှာ အရိုးသားဆုံး ယောကျာ်းလေးတစ်ယောက်ပါ၊ ဘယ်အရာမဆို စဉ်းစားချင့်ချိန်လွန်းစွာ လုပ်တက်တယ် .. ပြောလိုက်ရင်လည်း ဘာမှ မသိသလိုလိုနဲ့ သူ့ကိုယ်သူလဲ မိန်းကလေးတွေနဲ့  ကင်းရှင်းကြောင်း လေလုံးထွားတက်တာကြောင့်… ကျွန်တော်တို့ သူ့ကိုမြှောက်ပေးမိတယ်… နောက်ဆုံးတော့ မခံချင်စိတ်နဲ့ ယောက်ျား မာန တက်လာပြီး … ``ငါမင်းတို့ ထက် မညံ့စေရဘူး`` လို့ ဟစ်ကြွေးသွားတယ်.. အမြဲတမ်း အခန်းထဲ ဝင်လာတိုင်း ကျွန်တော်တို့ မေးလိုက်ရင် ကျဆုံးခန်း ဝင်လာတဲ့ သူက ကျွန်တော်တို့ စကားတွေကို မခံချင်စိတ်နဲ့ ခုခံလာချင်ပုံရတယ်.. အဲဒီလိုဖြစ်အောင်လဲ သူ့စိတ်ကို အပြတ် နှိုးဆွပေးလိုက်တယ်….
သူ့ကောင်မလေး နဲ့ ပတ်သတ်ရင် အဖြစ်သည်းပြီး အချစ်ကြီးလွန်းတယ် .. မိတ်ဆက်ပေးဖို့ကိုလည်း သဝန်တိုတက်တယ်.. ကောင်မလေးပါးလေးနမ်းဖို့ကိုတောင် .. ပါးရိုက်ခံရမှာကြောက်တဲ့ကောင် .. ကျွန်တော်တို့ ပြောတော့ လက်ထပ်မယ်လို့ အတည်ရည်စူးထားတာမို့ .. သူ့ကောင်မလေး စိတ်ဆိုးသွားမှာကို သေမလာက်ကြောက်တဲ့သူ.. ဒါပေမဲ့ ကျွန်တော်တို့ရဲ့ စကားလုံးတွေကို သူကြာရှည်မခံနိုင်တော့ဘူး… အဓိက ကတော့ သူ့ကို အခြောက်လို့ ပြောရင် အရမ်းစိတ်ဆိုးတယ်… သူ့အားနည်းချက်တွေကို သိထားတဲ့ ကျွန်တော်တို့က .. သူ့စိတ်ကို ပိုပြီး မခံချင်အောင် မြှောက်ပေးမိတယ်…
အဲဒီညက .. လကြီး ထိန်ထိန်သာ နေပါတယ်.. မှတ်မှတ်ရရ ကျွန်တော်တို့ ညဥ့်နက်မှ အိပ်ဖြစ်တယ်….
………
ဒီနေ့ မင်းသွင်နဲ့ ကျွန်တော် သုတ အစား ရင်ခုန်နေမိတယ်… သူ့ကောင်မလေး နဲ့ တွေ့ဖို့ သွားတယ်… ကျွန်တော်တို့ကိုလည်း ကတိပေးသွားလေရဲ့ … တံခါးခေါက်သံအကြားမှာ ကျွန်တော် မင်းသွင်ကို မျက်စပစ်ပြလိုက်တယ်… မင်းသွင်က တံခါး ဂျက်ကို သွားဖွင့်ပေးတယ်.. သုတ  က အခန်းထဲဝင်လာပြီး အိတ်ကို အိပ်ရာပေါ်ပစ်ချရင်း . ကျွန်တော်တို့ မမေးခင်မှာဘဲ လက်မထောင်ပြတယ်..
``ဟား … ဟား… တော်တယ်ကွာ ဒါမှ ငါ့တပည့် … လုံးဝ အိုကေတယ်မဟုတ်လား``
``မင်းတို့ ငါ့ကို အခြောက်လို့ မခေါ်ရတော့ဘူး``
``အေးပါကွာ … မခေါ်တော့ပါဘူး .. ကောင်မလေး စိတ်ဆိုးလား``
``ငါ့ကို အရမ်းချစ်တော့ မဆိုးပါဘူး``
``ငါမပြောဘူးလား.. မဆိုးပါဘူးလို့ .. ဝမ်းသာတယ် သူငယ်ချင်း ကဲ ဒီနေ့ညနေ မီးမီး နဲ့ ချိန်းထားလို့  ရေသွားချိုးလိုက်အုံးမယ်.. အိုကေ .. သူငယ်ချင်း``
ကျွန်တော်ည ပြန်လာတော့ အိပ်မပျော်ဘဲ ရှိနေသေးတဲ့ သုတ ကို တွေ့ရတယ်..
``ဟေ့ကောင် မအိပ်သေးဘူးလား.. ဘာလဲ .. သတိရနေတာလား``
``ငါ ပြန်တွေးရင်း .. ငါ့ကိုယ်ငါ ဒေါသဖြစ်နေမိသလိုဘဲ … မှားပြီးလားလို့ လဲ တွေးမိတယ်…``
``ဟာ … မင်းကလဲ အတွေးလွန်ပြန်ပြီ .. ပြီးသွားတာကို ပြန်တွေးမနေနဲ့ ဘာမှ မမှားဘူး .. အိပ်ကြစို့```
တကယ်တော့ သူ အိပ်ရာဝင်ပေမဲ့ အိပ်မပျော်ခဲ့မှန်း ကျွန်တော် သိတယ် ကျွန်တော် သူ့ကို ကြည့်ပြီး ကျိတ်ပြုံးပြုံးမိနေသေးတယ်.. သူ့ကောင်မလေး ကို သူခေါ်တဲ့ ``ဂျူးဂျူး`` ကလွဲပြီး ကျွန်တော်တို့ ဘာမှမသိ .. သူ့ကောင်လေး လောက် အိနြေ္ဒ သိက္ခာကြီးတာ မရှိတဲ့ အကြောင်း မကြာခဏ ပြောတက်လွန်းတာကြောင့် ကျွန်တော်နဲ့ မင်းသွင် သုတ ကိုမြှောက်ပေးခဲ့တာ… ကဲခုတော့ နှစ်ယောက်စလုံး ဘာတက်နိုင်သေးလဲ နောက်ဆိုရင် သူ့ဆီက အဲဒီစကားတွေ ကြားရတော့မှာ မဟုတ်… နောက်ဆုံး.. အချစ်ဆိုတာ ဘာမှ မဟုတ်ပါဘူး.. လို့ တွေးရင်း ကျွန်တော် သဘောကျစွာ ပြုံးမိသေးတယ်……
(၃)
ဒီနေ့ ပိုက်ဆံ အသုံးပြတ်သွားလို့ … အိမ်ပြန်ခဲ့တယ်… အိမ်မှာ ဘယ်သူမှ မရှိဘူး… အလှူသွားကြတယ်တဲ့.. ခိုင်းတဲ့ ကောင်မလေးသာ ကျန်ခဲ့တာမို့ .. ပိုက်ဆံစုတက်တဲ့ ညီမလေး ``နေရီသွင်`` အခန်းထဲဘဲဝင်ခဲ့တယ်… ခါတိုင်းလဲ အံဆွဲထဲက ညီမလေး ပိုက်ဆံအိတ်ကို နှိုက်ပြီး စာရေးထားနေကျမို့ အံဆွဲကိုဖွင်တော့ ပိုက်ဆံအိတ် မတွေ့ဘူး…. တခြားနေရာမှာလဲ မတွေ့… ဒါနဲ့ စားပွဲပေါ်က စာအုပ်တွေကြားထဲများ ညှပ်ထားမလားလို့ ရှာကြည့်သေးတယ်… ပိုက်ဆံတော့ တွေ့ဘူး … စာအုပ်တစ်အုပ်ကြားထဲက ဓါတ်ပုံ တစ်ပုံထွက်ကျလာတယ်…..
ကျွန်တော့် မျက်လုံးတွေ ဓါတ်ပုံကိုကြည့်ရင်း ပြူးကျယ်ဝိုင်းစက်သွားတယ်… ရင်တွေလည်း တဒိန်းဒိန်း ခုန်လာတယ်….
ဓါတ်ပုံက သုတ ရဲ့ ဓါတ်ပုံဘဲ …. ဓါတ်ပုံရဲ့ နောက်ကျောမှာ.. ချစ်ဆုံး ဂျူးဂျူး အတွက် အမှတ်တရ သုတ လို့ ရေးထားတဲ့စာက ကျွန်တော့်ကို ပိုပြီး သွေးပျက်သွားစေခဲ့တယ်… ညီမလေးနဲ့ သုတဟာ ချစ်သူတွေဖြစ်နေတယ်လို့ လုံးဝ မသိခဲပေ…… သုတ ကလဲ လျှို့ဝှက်လွန်းသူမို့ ဘာမှမသိခဲ့ရ .. ခုတော့ … သွားပြီ … ကျွန်တော့်ခေါင်းကို ကိုယ့်လက်နဲ့ရိုက်ရင်း ယူကျုံးမရ ဖြစ်မိတယ် … ခုတော့ ညီမလေးဟာ … ကျွန်တော့်ကြောင့် ဒုက္ခရောက်ပြီ … နှမချင်း မစာနာဘဲ မြှောက်ပေးမိတဲ့ ကိုယ့်အပြစ်ကြောင့် ခု ကိုယ့်ညီမဖြစ်နေပြီ……
အားလုံး ငါ့အပြစ်တွေပါ… ရိုးသားတဲ့ သုတ ရဲ့ စိတ်ဓါတ်ကို ချိုးနှိမ်ခဲ့တာ ငါ့အပြစ်ပါ .. သုတ မင်းမှာ အပြစ်မရှိပါဘူး… ငါဘယ်လို လုပ်ရမလဲ… မင်းကို  ငါဘယ်လို ရင်ဆိုင်ရလဲ … မင်းတို့နှစ်ယောက်ရဲ့ ဖြူစင်ခြင်းကို ငါ…. အရောင်ဆိုးခဲ့တာ…. မင်းရော ညီမလေးရော … ငါ့ကို မခွင့်လွှတ်ကြပါနဲ့….
ခု ငါ့ရင်ထဲမှာ …. ဒီအစိုင်အခဲကြီး တစ်ခုက ဝင်ရောက်ပြီး အချိန်ပြည့် စိုးမိုးနေတယ် … ငါအရမ်းခံစားရတယ် .. မင်းရဲ့ မေးခွန်းတွေကို ငါဘယ်လို ဖြေရမလဲ … တစ်ချိန်ကျရင် ငါနဲ့ နေရီ  မောင်နှမဆိုတာ မင်းသိလာမှာဘဲ … မင်းဘယ်လိုရင်ဆိုင်မလဲ … အတွေးတွေနဲ့ ရှုပ်လိုက်တာ… ဒီအပြစ်တွေကို ငါ…. ဘယ်မျက်နှာနဲ့ မင်းကို ပြောပြနိုင်မှာလဲ … ငါတို့တွေ ဝေးသွားကြရင် ကောင်းမယ် …
…………..
တံခါးဖွင့် … ဟေ့ … တံခါးဖွင့်အုံး …
``ဟာ …. သုတ  … မင်း နောက်ကျလှချည်လား ကွာ…``
``ဟင် … သုတ အရက်တွေ သောက်လာတယ်``
``ဟုတ်တယ်……``
``ထူးဆန်းလိုက်တာ …. ငါတို့လဲ မပါဘဲနဲ့ … ခါတိုင်း တိုက်ရင်တောင် သောက်တာ မဟုတ်ဘူး ဘာဖြစ်လာတာလဲ ``
``ဘာဖြစ်လာတာလဲ … ဟား… အရက် သောက်တယ်ကွာ … စိတ်ညစ်လို့ … ညစ်ယုံတင်မကဘူး … သေပစ်လိုက်ချင်တယ်… လောကကြီးရေ … ဒီကောင့်ကို သေခွင့်ပေးပါအေ့….``
``သိပ်မအော်နဲ့ …. ဘာဖြစ်လို့လဲ …``
``မင်းတို့လေ… မင်းတို့ … သုတ ဆိုတဲ့ ကောင်ရဲ့ သူငယ်ချင်းကောင်းကြီးတွေ ငါဆရာကိုးကွယ်မှားသွားပြီ… အေ့ … ဘဝမှာ ဂျူးသိပ်ကြိုက်လို့ ငါက ချစ်စနိုးနဲ့ ဂျူးဂျူး လို့ ခေါ်တာ… သူက ဒီနေ့ ငါ့ကို ဘာပြောတယ်မှတ်လဲ…. ငါ့တသက်မှာ… အကြောက်ဆုံး စကားတွေကို သူ့ပါးစပ်က ရက်ရက်စက်စက် ခြွေချရက်တယ်ကွာ…
``ရှင့်ကိုတခြား ယောက်ျားတွေနဲ့ မတူတဲ့ ယောက်ျားမျိုး မှတ်နေတာ… တဲ့ … ကျွန်မ ရှင့်ကို ပေးလိုက်တဲ့ အချစ်တွေဟာ အဆုံးစွန်ထိ ကုန်ဆုံးသွားပါပြီ… နောက်ဆိုရင် ကျွန်မနဲ့တွေ့ဖို့ ဘယ်တော့မှ မကြိုးစားပါနဲ့တော့တဲ့…
ကျွန်မ မုန်းတဲ့ ယောက်ျား အမျုိးအစားထဲမှာ ရှင်လည်း ပါသွားပါပြီ …. ကျွန်မ ရှင့်ကို မေ့လိုက်ပြီ … တဲ့ … ကွာ… ``
သု ကပြောရင်း … မျက်ရည်တွေနဲ့ ငိုပါတယ်…
ကျွန်တော်လဲ ဘာလုပ်ရမှန်း မသိအောင် ဖြစ်ပြီး သုတ ကျောကုန်းကိုဖက်ရင်း … မျက်ရည်ကျမိတယ် …
``သုတ … ငါ့ကို မခွင့်လွှတ်ပါနဲ့ကွာ … မင်းစိတ်ထဲမှာ ရှိသလောက် ဆွဲထိုးပစ်လိုက်စမ်းပါ … ငါခံပါ့မယ်… ငါလဲ ငါ့ကိုယ်ငါ မကျေနပ်ခဲ့တဲ့ ရက်တွေများပြီ … ငါမှားခဲ့ပါတယ်…. နောက်တလဲ ရတယ် …. ``
``မင်းတို့ အပြစ်ချည်းဘဲမဟုတ်ပါဘူး … ကိုယ့်ချစ်သူရဲ့ စိတ်အကြောင်းကို နားလည်နေတဲ့ ငါကိုယ်တိုင် အမှားကို ကျူးလွန်မိတာ .. ငါ့အပြစ်ပါ`` … ငါသိတယ် ဂျူးဂျူး ငါ့ကိုဘယ်တော့မှ ခွင့်လွှတ်တော့မှာမဟုတ်ဘူး … သေချာပါတယ်ကွာ … အေ့ .. ငါ့နှလုံးသား ကလည်း အောက်ဆီဂျင်မရှိတော့တဲ့ နှလုံးသားလို ကြာရင် ရပ်သွားမှာပါဘဲ … ကောင်းပါတယ်…``
ကုတင်ပေါ်ပစ်လဲကျသွားတဲ့ သုတကို ကြည့်ရင်း စိတ်ထဲမှာထိခိုက်ကြွေမွကုန်သလို ခံစားရတယ် … ကျွန်တော် ဝရံတာဘက် ထွက်လာခဲ့တယ် … လကြီး သာပေမဲ့ တစ်ခြမ်းပဲ့ နေတယ် … ဒီလို နက်ရှိုင်းတဲ့ ခံစားမှုမျိုး တခါမှ မခံစားဘူးတာမို့ … ဒီတစ်ခါတော့ ပြင်မရတဲ့ အမှားတွေဟာ ဘယ်အချိန်ထိ ဒါဏ်သင့် နေအုံးမလဲ .. တွေးရင်း … ကြောက်လာမိတယ် …
ဖွင့်ဟ ဝန်ခံခွင့် မရှိတဲ့ ငါ့အပြစ်တွေကို …… ငါကိုယ်တိုင် ခံစား ရင်းနဲ့ဘဲ ပြန်ပေးဆပ်ပါရစေတော့………  

ပိတောက်မြေ မဂ္ဂဇင်း
ချောအိမာန်(မန္တလေး)
11.10.05 : 10:00 P.M

Monday, September 6, 2010

စာရေးဆရာတစ်ဦး၏ ကြေကွဲခြင်း

                            
 လက်ထဲမှာပါလာတဲ့ စာမူခလေးကိုကြည့်ပြီး ….သူလေးတွဲစွာသက်ပြင်းချလိုက်မိတယ်….97လောက်က စရတဲ့
ဝတ္တုတိုစာမူခက ခုနှစ်ရာ …. အဲဒီတုန်းကမှတ်မိသေးတယ်…ဘာဘဲဖြစ်ဖြစ် ဆန်ဝယ်နိုင်တယ် .. စတိတ်ရှိုး
ခုနှစ်ရာတန်လက်မှတ်နဲ့ ကြည့်နိုင်သေးတယ်…ခုကိုယ့်လက်ထဲပါလာတဲ့ စာမူခက သုံးထောင် အိမ်အပြန်  အိမ်သူ ကျေနပ်အောင် ဘာဝယ်ရသနည်း .. သူခေါင်းကိုက်သွားတယ် .. ကားခ နှူတ်ရင်တောင် သုံးထောင်မပြည့်ချင်..တော်သေးတယ် ….ဆိုင်ကယ်အစုတ်လေးရှိနေသေးလို့ …
    စာရေးဆရာရဲ့ ပီတိကိုတော့ တစ်ချို့က ခံစားနိုင်မှာမဟုတ်ဘုး…….ဗိုက်မ၀လို့တဲ့ .. ကျွန်တော်က လက်ထဲ
ပါလာတဲ့ စာအုပ်လေးကို တဖတ်ဖတ်လှန်ရင်း ဟန်ပါပါနဲ့ စူပါမားကတ်တစ်ခုပေါ်တက်သွားတယ် …. ဘာဝယ်မယ် ဆိုတဲ့စိတ်ကူးမရှိပေမဲ့ …ဘာကြည့်ကြည့် အရင်းမစိုက်ရတာမို့ ကြည့်ရတာလဲတစ်မျိုးအရသာပေါ့.
အိမ်သူကိုတော့ ဒီလိုနေရာခေါ်ဖို့စိတ်မကူးဘူး … မိန်းမဆိုတော့ တွေ့ကရာ အကုန်ဝယ်ချင်တာ …
    ကျွန်တော်က စာအုပ်သမားဆိုတော့ စာအုပ်တွေရောင်းတဲ့ အထပ်ရောက်သွားတယ် … ကျွန်တော် စိတ်ဝင်စားနိုင်မဲ့စာအုပ်လေးတွေလျှောက်ကိုင်ကြည့်နေတုန်း …… အသက်ဆယ့်ငါးနှစ်ပတ်ဝန်းကျင် …. ကောင်မလေးက အိတ်ဆောင်ဗေဒင်စာအုပ်လေးတွေကို သူ့နေ့နဲ့သူအပြိုင်ရွေးနေတယ် … ကျန်တဲ့နှစ်ယောက်က စာအုပ်ရွေးနေရင်း … သူတို့ထဲက မှန်ကြောင်လေးနဲ့ ကောင်လေးတစ်ယောက်က ပြောတယ် ……
‘မြသန်းတင့်ရဲ့ သုခမြို့တော်တို့ …. ရွှေဥဒေါင်းတို့ …. ဂျာနယ်ကျော်မမလေးတို့ဖတ်ပါလားတဲ့ ..
ကောင်မလေးကခေါင်းခါရင်း….
‘အရူးဘဲ ဒီမှာ ချစ်သူဖတ်ဖို့ ယောက်ျားတို့အကြောင်းသိကောင်းစရာတို့ … သမီးလေးဖတ်ဖို့တို့ဖတ်မှာ….
ငါတို့လို အရွယ်နုနုဖတ်ဖတ်တွေက စာအကြီးကြီးတွေမဖတ်သင့်သေးဘူး’
   ကောင်မလေးပြောတော့ ကောင်လေးက ဘာမှမပြောတော့ဘူး….ကျွန်တော်စိတ်ကြိုက်စာအုပ်မတွေ့တာနဲ့
အဲဒီနေရာက ရှောင်ရင်း … အောက်ထပ်ဆင်းခဲ့တယ် .. စက်လှေကားနဲ့ဆင်းပြီး အောက်ရောက်တော့ ခုနက
အုပ်စုကိုတွေ့ပြန်တယ် .. အဲဒီအောက်ထပ်မှာ မိတ်ကပ်ကုမ္ပဏီတစ်ခုရဲ့ Promotion ပွဲတစ်ခုရှိသလို ……
အဆိုတော် ပေါက်စလေးတွေအုပ်စုရဲ့ CD တိတ်ခွေ ရောင်းပြီး လက်မှတ်ထိုးပွဲရှိလို့ လူစည်နေတယ် ..  ..
ကောင်မလေးတွေ အလုအယက်သွားဝယ်… လက်မှတ်ထိုးခိုင်းကြတယ် …အဲဒီအဆိုတော်တွေ မြင်ဖူးအောင်
တိုးကြည့်ပေမဲ့ သူတို့ကို ကျွန်တော်မသိဘူး…
    ကောင်မလေးတွေက ခုန်ဆွ ခုန်ဆွနဲ့ မော်ဒယ်ရှိုးပြတဲ့ စင်နားရောက်သွားပြန်တယ် … သူတို့ထဲက ပါလာတဲ့ ကောင်လေးက ၀ါသနာမပါဘူးထင်ပါရဲ့ … ခပ်ဝေးဝေးကနေကြည့်နေတယ် .. ကောင်မလေးတွေက ခနစောင့်ဆိုတဲ့ သဘောနဲ့ လက်ကာပြပြီးရှေ့တိုးသွားကြတယ် ..
    ကောင်လေးက လူတွေများလာလို့ တိုးရင်းနဲ့ ကျွန်တော့နားရောက်လာတယ် … သူက စာအုပ်လေးပိုက်လို့
စင်ပေါ်ကိုကြည့်နေတယ် .. ကျွန်တော်က အမှတ်မထင်ဘဲ သူ့လက်ထဲကစာအုပ်လေးဆီ စိတ်ရောက်သွားတယ်…..အစွန်းအစလေးမြင်လိုက်ရတာနဲ့ ကျွန်တော့ရင်တွေ ရင်ခုန်လှုပ်ရှားသွားတယ် ..
ဘ၀မှာ ရှိစုမဲ့စုနဲ့ထုတ်ထားတဲ့ ကျွန်တော့စာအုပ်လေး စာဖတ်သူ တစ်ယောက်ရဲ့လက်ထဲမှာရောက်ရှိနေခြင်း
အတွက် ၀မ်းသာပီတိဖြစ်သွားမိတယ် … စိတ်ထဲမှာ အဲဒီလူငယ်လေးနဲ့လည်း စကားပြောချင်စိတ်ပေါက်သွား
တယ် ….ယဉ်ကျေးပုံရတဲ့ အဲဒီလူငယ်လေးကိုကြည့်ရင်း ….  
     ‘ ညီလေး ‘
 ကျွန်တော် ခေါ်လိုက်တော့ သူကလှည့်ကြည့်တယ် …
‘ ညီလေးက စာဖတ်ဝါသနာပါပုံရတယ်နော် .. ညီလေးလက်ထဲကစာအုပ်ဘယ်က၀ယ်လာတာလဲ’
‘ ဒီစာအုပ်ကို မနည်းရှာလာရတာ .. ဖတ်ချင်နေတာကြာပြီ….ဆိုင်က လက်ကျန်လေးတွေ့လို့ အသည်းသန်
ဝယ်လာတာ .. ကောင်းတယ် အကိုရ … ကျွန်တော် ကြိုက်တဲ့ဘ၀ဒဿနတွေ အများကြီးပါတယ် ‘
‘ ဟုတ်လား အကိုလဲ စာဖတ်ဝါသနာပါတယ် ‘
‘ အကိုဖတ်ချင်လို့လား ငှားပေးမယ် ‘
‘ ရပါတယ် ငါ့ညီရာ .. ကျေးဇူးတင်ပါတယ် ‘
‘ ခုခေတ်စာအုပ် ဈေးတွေကကြီးတယ် ‘
‘ ကျွန်တော်ကတော့ စာကောင်းရင်ဈေးမမြင်ပါဘူး .. ကျွန်တော်တို့အတွက် အထောက်အကူဖြစ်မဲ့ဟာ ..
ဖတ်ကောင်းတာဆိုကြိုက်တယ် ….ဒီစာအုပ်က တစ်ထောင့်ငါးရာပေးရတယ် …ကျွန်တော်ကြိုက်တဲ့ စာအုပ်
ဆိုရင် ချောင်တွေထဲထိလိုက်ရှာတယ် …. ဒီစာရေးဆရာက ဒီတစ်အုပ်ဘဲထွက်သေးတာ …ဘာဖြစ်လို့လဲမသိဘူး
အကိုဖတ်ဖူးလား ‘
ကျွန်တော် ခေါင်းငြိမ့်လိုက်တယ် ..
ကျွန်တော်စာအုပ်တွေအများကြီး  တစ်အုပ်ပြီးတစ်အုပ်ဆက်တိုက်ထုတ်ချင်တာပေါ့ … သူများတွေလိုလေ
ခေါင်းထဲမှာလဲ စာအုပ်တွေအများကြီး ကုန်ကြမ်းတွေအများကြီး ဒါပေမဲ့ ..
ကျွန်တော့ အတွေးတွေ ရပ်တန့်သွားတယ် … ခုနက ကောင်မလေးအုပ်စု သူတို့နားရောက်လာတယ် ..
‘ အာကာ .. အာကာ ငါ့ကို စာအုပ်ခဏပေးစမ်းပါ စာရွက်ပါလဲ စာရွက်ပေး’
‘ ဘာစာအုပ်မှ မပါဘူး .. စာရွက်လဲမပါဘူး .. ဘာလုပ်မလို့လဲ ‘
‘ ဟိုမှာ အဆိုတော်ကို လက်မှတ်ထိုးခိုင်းမလို့ …. ငါတို့မှာလဲ ဘာမှမပါဘူး’
‘ နင့်လက်ထဲက စာအုပ်ပေး ‘
‘ ဟာ ဘယ်ဖြစ်မလဲ .. ဒါလက်မှတ်ထိုးတဲ့စာအုပ်မဟုတ်ဘူး’
‘ ဟာဒီစာအုပ်တောင် ငါမနည်းရှာဝယ်လာရတာ ‘
‘ နင်ကပ်စီးတိုမနေနဲ့ နင့်စာအုပ် အစုတ်ပလုတ် တစ်ထောင့်ငါးရာပေးရတယ်မဟုတ်လား … ငါနှစ်ထာင်ပြန်ပေးမယ် . နင့်စာအုပ်က ဘယ်မှာရှာဝယ်ဝယ်ရတယ် … အဆိုတော်က ဒီနေ့တစ်ရက်တည်း’
‘ နင်တို့ဘယ်လိုတွေလဲ .. ငါဒီစာရေးဆရာနဲ့တွေ့ရင် လက်မှတ်ထိုးခိုင်းအုန်းမှာ မဖြစ်ဘူး ‘
ကောင်လေး မပေးချင်တာနဲက ခပ်ရွဲ့ရွဲ့ ပြောလိုက်ပုံဘဲ …
‘ နင်တကယ်ကြောင်တယ် .. အဲဒီဘိုးတော်ဘုရားလေးဖက်ပြေးတုန်းက ထွက်တဲ့ စာရေးဆရာက
သေပြီဟ ‘
‘ မဖြစ်နိုင်တာ ‘
‘ ကဲ ဖြစ်နိုင်တာ မဖြစ်နိုင်တာ အသာထား ကဲ ပေးပေး ‘
‘ အောက်ထပ်မှာစာအုပ်ဆင်းဝယ်ပေါ့ …အချိန်မရှိတော့ဘူဟ၊အဆိုတော်က ပြန်တော့မှာ ပေးစမ်းပါဆို ‘
 ပြောပြောဆိုဆို ကောင်မလေးက ကောင်လေးလက်ထဲက ကျွန်တော့စာအုပ်လေးကို ဘက်ကနဲ ဆွဲယူသွားခဲ့တယ် …. ကောင်လေးက စိတ်တိုပြီး ကျွတ်ကနဲစုတ်သပ်ရင်း .. ကြေကွဲသွားပုံရပါတယ် ..ကျွန်တော် လဲ တော်တော်ကြေကွဲသွားရပါတယ် … သူ့ရှေ့မှာ အရှင်လတ်လတ်ကြီး ရှိနေသော စာရေးဆရာတစ်ယောက်ဟာ သေဆုံးသွားပြီတဲ့ ..
  ‘ကျွန်တော့ကိုဆို အဲဒီလို သိပ်နိုင်စားတာဘဲ ..ခုကိစ္စတော့ လုံးဝသည်းမခံနိုင်ဘူး အစ်ကိုရာ ‘
ဘေးနားရှိနေသော ကျွန်တော့ကို လှမ်းပြောရင်း  ..ကောင်လေးမျက်ဝန်းတွေကြောင့် ကျွန်တော် စိတ်မကောင်း
ဖြစ်သွားရတယ် …
‘ စာအုပ်ကလည်းပြန်ရတော့မှာမဟုတ်ဘူး..စာပေရဲ့ တန်ဖိုးကို လုံးဝနားမလည်ဘူး .. ကျွန်တော့မှာ ရူးသွပ်မှု
တစ်ခုရှိတယ် အကို … စာပေကို ၀ါသနာပါလို့လားသိဘူး ..စာရေးဆရာတစ်ယောက်ရဲ့ လက်မှတ်ကို ကျွန်တော်အရမ်းတန်ဖိုးထားတယ် … ကျွန်တော် ကြိုက်တဲ့ စာရေးဆရာတွေရဲ့လက်မှတ်တွေ .. ဘယ်လိုနည်းနဲ့ဘဲခင်ခင် လက်မှတ်အရထိုးခိုင်းတယ် … သူတို့စာအုပ် ရှေ့မှာပေါ့ .. ကျွန်တော့မှာ လက်မှတ်တွေရှိတယ် …..အစ်ကို ကျွန်တော့ရူးသွပ်မှုက ရယ်ရလား ‘
‘ မရယ်ရပါဘူး ငါ့ညီရ လူတွေမှာ ကိုယ့်တန်ဖိုးထားမှု နဲ့ ကိုယ်ပေါ့ အစ်ကိုလည်း ငါ့ညီလိုပါဘဲ … ငါ့ညီ
စာအုပ်လေးအတွက်စိတ်မကောင်းမဖြစ်ပါနဲ့ အစ်ကို့ဆီရှိတယ် ပို့ပေးမယ် ‘
‘ ဟာ နေပါစေအစ်ကိုရာ အကိုလဲကြိုက်လို့ ၀ယ်ထားတာဘဲ ..မလုပ်ပါနဲ့ ‘
‘ ရတယ် အစ်ကို့မှာ အပိုရှိတယ် ..ငါ့ညီနာမည်နဲ့လိပ်စာပြော ‘
‘ ကျွန်တော်ကနယ်ကပါ ..နာမည်က သားဇင် လိပ်စာက ……………………….’
‘ အိုကေ …ငါ့ညီကို အစ်ကိုပို့ပေးလိုက်မယ် ‘
‘ အစ်ကို နာမည်ပြောပါဦး ‘
‘ ကိုကို လို့မှတ်ထားလိုက် ကဲ သွားလိုက်ဦးမယ် ‘
ကျွန်တော်ထွက်လာခဲ့ပြီး ကောင်လေးက ကောင်မလေးအုပ်စုကို စောင့်ရင်း ကျန်ရစ်တယ် ….
ကျွန်တော်ကတော့ ဈေးထဲဝင်ခဲ့ပြီး မဟေသီဖို့ လိမ္မော်သီးဝယ်ခဲ့လိုက်တယ်……
အိမ်ရောက်တော့ တစ်နေ့တာ အဖြစ်ပျက်လေးကို ပြန်တွေးရင်း ကျေနပ်ရမှာလိုလို…..ကြေကွဲရမှာလိုလို
စိတ်ထဲစိုးနစ်နစ်ကြီးနဲ့တမျိုးခံစားရတယ် …..
    ကျွန်တော်ကိုယ်တိုင်ကလည်း စာပေကို တန်ဖိုးမထားတဲ့သူဆို သိပ်မုန်းတာဘဲ …တန်ဖိုးထားတဲ့သူကျ
အလိုလို ခင်မင်မိပြန်တယ် ….. ကျွန်တော်စာအုပ်မထုတ်ဖြစ်တာ ငါးနှစ်ရှိပါပြီ … သူတို့အသက်အရွယ်သေးသေးလေးနဲ့ ကြည့်ရင်တော့ ကျွန်တော်ဟာ ဘိုးတော်ဘုရားခေတ်က စာရေးဆရာ ပေါ့လေ …
            ဒီခေတ်စာအုပ်တွေကို ဟောတစ်အုပ်၊ဟောတစ်အုပ်နဲ့ ထုတ်နေနိုင်သူများကို ချီးကျူးပါတယ် … တစ်ခါ
တည်းဆယ်အုပ်တန်းရေးထားတာတို့ အုပ်နှစ်ဆယ် စာရှိနေတာတို့ …၀င်ငွေကလည်းအဆင်ပြေဘို့ .. စာဖတ်သူ ကျောင်းသူချာတိတ်လေးတွေကလည်း အသဲစွဲဖြစ်လို့ …..
          ကျွန်တော့်မှာတော့ ဆယ်အုပ်ရေးထားတာ အဆင်သင့်ရှိဖို့နေနေသာသာ … တစ်အုပ်ဆိုရင်ကို
အချိန်အတော်ပေးရတာ ….. အပြန်ပြန်အလှန်လှန်ဖတ်နဲ့ ဘယ်ထုတ်ဝေသူကမှ စိတ်မရှည်ဘူး …. အဲဒါကြောင့် ကျွန်တော့်ကို ဘယ်စာအုပ်တိုက်ကမှ မကမ်းလှမ်းတော့ဘူး … ကျွန်တော်နဲ့ စာဖတ်ပရိသတ်လည်း အဆက်အသွယ်ပြတ်ပြီး ကင်းဝေးသွားတယ် …. ဒီနေ့ သားဇင်ဆိုတဲ့ ချာတိတ်လေးကို စားအုပ်ရှေ့မှာ ကျွန်တော့လက်မှတ်ထိုးပြီး စာအုပ်ပို့ပေးလိုက်တယ် စာအုပ်ရရင် သူသိပ်ဝမ်းသာပြီး စာရေးချင်မှာဘဲ ဆိုပြီး လိပ်စာလေးပါထည့်ရေးပေးလိုက်တယ်…..
ကျွန်တော်လည်း သူ့ပြန်စာလေးကို မျှော်နေမိတယ် …….
    တခါတလေ လောကကြီးဟာ အင်မတန်အံ့သြစရာကောင်းတယ် ……. ကြောင်းကျိုးညီညွတ်မှု မရှိဘဲ
ခဏလေးလာတိုက်ဆိုင်တဲ့ လူအပေါ်ခင်မင်နေမိတတ်သလို… နေ့တိုင်းမြင် …. နေ့တိုင်းတွေ့ တစ်ရုံးတည်း
အချင်းချင်းမှာ မျက်နာချင်းမဆိုင်ချင် လောက်အောင် ဖြစ်နေသူတွေလည်း အများသား …..
              ကျွန်တော် … သားဇင်ဆီက တုန့်ပြန်မှုကို မျှော်လင့်နေခဲ့ပေမယ့် … သူ့ရဲ့ တုန့်ပြန်မှုဟာ အံ့သြမှာလား
ဝမ်းသာမှာလား …….. သူ့ရဲ့ရူးသွပ်မှုလေးတစ်ခုအတွက် ကျွန်တော့် လက်မှတ်နဲ့ စာအုပ်ဟာ တန်ဖိုးရှိစေမှာပါ။
     သိပ်မကြာခင်မှာဘဲ ကျွန်တော်ဆီကို သားဇင်နေတဲ့ မြို့ကနေစာတစ်စောင်ရောက်လာပါတယ် …….
ကျွန်တော်စာလေးကိုဖောက်ရင်း ဖတ်ကြည့်လိုက်တော့ သားဇင်ဆီကမဟုတ်ဘဲ သားဇင်အမေဆီက ဖြစ်နေကြောင်း အံ့သြစွာတွေ့လိုက်ရတယ် ……..
                   ဆရာ …..
              သားလေးဆီကို မှတ်မှတ်ရရစာအုပ်ပို့ပေးလိုက်တဲ့အတွက် ကျေးဇူးအများကြီးတင်ပါတယ် …..
သားလေးကစာပေကို အလွန်ဝါသနာပါပါတယ် …. သူ့စာအုပ်စင်မှာ စာအုပ်တွေအများကြီးပါဘဲ စာရေး
ဆရာရဲ့လက်မှတ်တွေကိုလည်း သူ အလွန်တန်ဖိုးထားပါတယ် … ဆရာလက်မှတ်နဲ့ စာအုပ်ပို့ပေးလိုက်တာ
သားလေးသိရင် သိပ်ဝမ်းသာမှာ … သားလေးက ဆရာစာအုပ်လေး မရောက်ခင် တစ်ရက်က ဆိုင်ကယ်အက်စီးဒင့် ဖြစ်လို့  ရုတ်တရက်ဆုံးသွားပါတယ် …. ကျွန်မတို့မှာ သားလေးတစ်ယောက်တည်းမို့ များစွာ ယူကျုံးမရဖြစ်ရပါတယ်.. သားလေးအမေတစ်ယောက် အနေနဲ့ ဆရာ့ကို ..
ကျေးဇူးတင်စကားပြောပါရစေ …..
                                                                                                        ကျေးဇူးတင်စွာဖြင့်
                                                                                                             ဒေါ်ခင်မြဇင်
                     ကျွန်တော် စာဖတ်ပြီး …. တော်တော်ကြေကွဲသွားပါတယ် ..
    စာရေးဆရာတစ်ယောက်ဘ၀မှာ စာရေးရင်းနဲ့ဖြစ်ဖြစ်၊ စိတ်ကူးရင်းနဲ့ဖြစ်ဖြစ် ..ကြေကွဲမှုကို စာထဲနှစ်ပြီး
ခံစားခဲ့ရဘူးတယ်….အပြင်မှာ ခံစားဘူးတာ ကျွန်တော့ဘ၀မှာ မရှိသလောက်ပင် … ဒီတစ်ခါတော့ အပြင်မှာ
ကျွန်တော်ထိခိုက်ကြေကွဲစွာ ခံစားလိုက်ရပါတော့တယ် …… ဒါဟာ စာရေးဆရာတစ်ယောက်ရဲ့ ကြေကွဲခြင်းဆိုလည်း မှန်နိုင်ပါတယ် ……….
               သားဇင်ရေ ကောင်းရာဘုံဘ၀မှာ ပျော်ရွှင်ပါစေကွာ……
               ငါ့ညီအတွက် အမှတ်တရ ၀တ္တုလေးတပုဒ်ကို ကိုယ်ရေးဖို့ စိတ်ကူးလိုက်ပြီ ….
              အဲဒီ ၀တ္တုတိုလေးရဲ့နာမည်က
             ‘စာရေးဆရာတစ်ဦး၏ ကြေကွဲခြင်း ‘ တဲ့ …………………။
                                                                                                    
ပန်းအလကာင်္မဂ္ဂဇင်း(6.11.2006)                                                                                                                                                 ချောအိမာန်(မန္တလေး)